Týrızm salasynda otandyq ınvestorlar men sapaly ǵylymı zertteýler ne úshin qajet — sarapshy paıymy
ASTANA. KAZINFORM — «Týrıstik qamqor» korporatıvtik qorynyń, Týroperatorlar qaýymdastyǵynyń tóraǵasy Inna Reı BIZDIÑ ORTA podkastynda elimizdegi týrızm salasyn tıimdi damytý joldaryn aıtyp berdi.
Aldaǵy birneshe jylǵa kóz júgirtken Inna Reı qazirgi tańda bul salaǵa degen qyzyǵýshylyq pen nazardyń artyp, sondaı-aq memlekettik qurylymdar tarapynan kózqarastyń ózgerip jatqanyn atap ótti.
Onyń aıtýynsha, másele tek kadr daıarlaýda ǵana emes, sonymen qatar eldegi ǵylymı zertteýlerdiń jetkiliksiz damýyna da baılanysty. Sonymen birge ol sheteldik emes, otandyq ınvestorlarǵa súıenýdiń mańyzdylyǵyn erekshe toqtaldy.
— Shetelden keletin ınvestorlar kóbine qas qaǵym sáttegi tıimdilikke baǵyttalatynyn tájirıbe kórsetip otyr. Sonyń saldarynan sapaly ári turaqty jobanyń ornyna názik tabıǵı aýmaqtarǵa shamadan tys júkteme túsýi múmkin. Al óziniń jáne balalarynyń bolashaǵyn osy elmen baılanystyratyn jergilikti ınvestorlar uzaq merzimdi ári turaqty jobalarǵa basa mán beredi, — dep sanaıdy sarapshy.
Kóptegen Qazaqstan azamaty úshin shetelde demalý el ishinde demalǵannan arzanyraq ekeni jasyryn emes. Bul máseleni sheshý úshin Inna Reı Reseı tájirıbesin mysalǵa keltirdi. Onda ishki týrızmge arnalǵan keshbek júıesi jumys isteıdi, ıaǵnı jumsalǵan qarajattyń bir bóligi azamattarǵa qaıtarylady.
— Bizde de sharalar qabyldanyp jatyr. Máselen, balalar el ishinde tegin usha alady. Otbasylyq demalysqa jaǵdaı jasalyp, qomaqty qarjy bólinip jatyr. Degenmen, bul ázirge keń taralǵan trendke aınala qoıǵan joq. Jeńildikterdi eskergenniń ózinde Qazaqstan ishinde búkil otbasymen saıahattaý kóbine shetelde demalǵannan qymbatqa túsedi, — dedi ol.
Sarapshynyń paıymynsha, ishki týrızmdi qoldaýdyń tikeleı sharalaryn, onyń ishinde el ishinde saıahattaıtyn azamattarǵa shyǵyndardy sýbsıdııalaý nemese óteý tetikterin engizý qajet.
— Ol úshin týrıstik aǵynnyń áserin naqty esepteýge, basym baǵyttardy anyqtaýǵa jáne tıimdi bólýge múmkindik beretin ǵylymı-zertteý bazasyn qalyptastyrý mańyzdy. Qazirgi ýaqytta kóptegen sheshim tájirıbe júzinde qabyldanyp jatyr. Al ǵylymı tásil nátıjege tezirek qol jetkizýge múmkindik beredi. Onsyz biz bir orynda turyp qalýymyz yqtımal, — dep atap ótti sarapshy.
Onyń aıtýynsha, dál osy zertteýlerge jaǵdaı jasaý jáne tıisti ınfraqurylymdy qalyptastyrý mindetin memleket óz moınyna alýy tıis. Sonda ǵana sala júıeli ári turaqty túrde damı alady.
Buǵan deıin 2025 jyldyń qorytyndysy boıynsha Qazaqstannyń týrızm salasy negizgi kórsetkishter boıynsha turaqty ósim kórsetkenin jazǵan edik.
