Týrızm salasynda qarapaıym qaýipsizdik standarttaryn buzý tyıylmaı tur — Bektenov
ASTANA. KAZINFORM — Bıyl Qatonqaraǵaı, Zaısan jáne Kendirlide jańa áýejaılardyń qurylysy aıaqtalady. Bul týraly Memleket basshysy Qasym-Jomart Toqaevtyń tóraǵalyǵymen ótip jatqan Úkimettiń keńeıtilgen otyrysynda Premer-mınıstr Oljas Bektenov aıtty.
— Týrızm salasyna qatysty oryndy syn aıtylyp jatyr. Qarapaıym qaýipsizdik standarttary men sanıtarııalyq normalardy buzý áli de tyıylmaı otyr. Osyǵan baılanysty Týrızm salasyn damytý boıynsha keshendi jospardy qaıta qarap, tıisti sharalardy qabyldap jatyrmyz, — dedi Premer-mınıstr.
Úkimet basshysynyń atap ótýinshe, Almaty taý klasteriniń qoldanystaǵy ınfraqurylymyn jańǵyrtý jáne jańa nysandar salý jumysy, onyń ishinde zamanaýı shańǵy kýrortynyń jobasy iske asyrylyp jatyr.
— Qazirgi tańda 17 kóterme jol jáne 53 shaqyrym trassa jumys isteıdi. Qosymsha 46 kóterme jol men 221 shaqyrym trassa iske qosylady. Kóktemde qurylys-montaj jumystaryn bastaımyz. Qatonqaraǵaı, Zaısan jáne Kendirlide jańa áýejaılardyń qurylysyn bıyl aıaqtaımyz. Ol osy óńirlerde týrızmdi damytýǵa qosymsha serpin beredi, — dedi Oljas Bektenov.
Budan buryn Úkimet Kómir generatsııasyn damytý jónindegi ulttyq jobany ázirleýge kiriskeni belgili boldy.
