Týrızm salasynda 600 myńnan astam adam jumyspen qamtyldy
ASTANA. KAZINFORM — Týrızm salasynyń el ekonomıkasyna qosqan úlesi 5 trln teńge deńgeıinde. Bul týraly Úkimet otyrysynda QR Týrızm jáne sport mınıstri Erbol Myrzabosynov málim etti.
— Búginde salada 600 myńnan astam adam jumyspen qamtylǵan. Salyq túsimderiniń kólemi 18%-ǵa artyp, 630 mlrd teńgege jetti. Sheteldik týrısterdiń shyǵyndary 2,9 mlrd AQSh dollaryn qurady. Týrızm salasyna tartylǵan ınvestıtsııalar kólemi ótken jylmen salystyrǵanda 33%-ǵa ósip, 1,3 trln teńgeni qurady. Salanyń el ekonomıkasyna qosqan úlesi 5 trln teńge deńgeıinde, — dedi E. Myrzabosynov.
Onyń aıtýynsha, salany odan ári damytý maqsatynda naýryz aıynda zańnamalyq túzetýler qabyldandy. Atap aıtqanda, týrıstik avtobýstar úshin «jasyl dáliz» tetigi engizilip jatyr. Bul uıymdastyrylǵan týrıstik toptardyń memlekettik shekaradan ótý ýaqytyn edáýir qysqartýǵa múmkindik beredi.
— Vızıt-ortalyq uǵymy zańnamalyq turǵydan bekitilip, olardy qurý men jumys isteýdiń negizgi talaptary aıqyndaldy. Týrıstik qyzmetterdiń sapasyn arttyrý maqsatynda gıdterdiń, ekskýrsııa júrgizýshileriniń jáne týrızm nusqaýshylarynyń qyzmetin júzege asyrý qaǵıdalary bekitiletin bolady. Sonymen qatar, 18 jasqa deıingi balalar úshin ulttyq parkterge tegin kirý engizildi. Bul shara ishki týrızm men ekologııalyq demalystyń qoljetimdiligin arttyrady. Sonymen qatar kanıkýl kezinde balalardyń bos ýaqytyn tıimdi uıymdastyrýǵa múmkindik beredi, — dedi mınıstr.
Buǵan deıin Imantaý-Shalqar týrızm aımaǵyna suranys artyp kele jatqanyn jazǵan edik.
