Týrızm salasyn damytýdyń 2029 jylǵa deıingi tujyrymdamasy jańartyldy
ASTANA. KAZINFORM — Týrızm jáne sport mınıstrligi múddeli memlekettik organdarmen birlesip, Týrızm salasyn damytýdyń 2029 jylǵa deıingi tujyrymdamasyn ózektendirdi. Tıisti Úkimet qaýlysy 13 shildede qabyldandy.
Buǵan deıingi tujyrymdamada 45 is-shara kózdelse, jańartylǵan qujatta olardyń sany 66-ǵa deıin ulǵaıtyldy. Jańa is-sharalar jospary ınjenerlik, kommýnaldyq jáne kólik ınfraqurylymyn damytý, bıznes-protsesterdi tsıfrlandyrý, vızıt-ortalyqtar salý, kýrortty óńirlerdi abattandyrý, týrızm salasynda kásipkerlik qyzmetti júrgizýge qolaıly jaǵdaı jasaý, memlekettik qoldaý tetikterin jetildirý, basym týrıstik aýmaqtarǵa strategııalyq ınvestorlardy tartý, bilikti kadrlar daıarlaý jáne basqa da mańyzdy baǵyttardy qamtıdy.
Tujyrymdamadaǵy negizgi jańashyldyqtardyń biri — óńirlerdiń damý josparlaryna týrızmdi ornyqty damytýǵa baǵyttalǵan naqty sharalardy engizý. Endi óńirlik josparlardaǵy týrızm salasyna qatysty mindetter men nysanaly kórsetkishter Týrızm jáne sport mınıstrligimen kelisilgennen keıin ǵana bekitiledi. Bul tásil salany damytýda biryńǵaı standarttardy qalyptastyryp, memlekettik saıasattyń tıimdi iske asyrylýyn qamtamasyz etedi.
Óńirlerdiń jumysyn shynaıy baǵalaý maqsatynda týrıstik ınfraqurylymdy damytý boıynsha ulttyq reıtıngtik júıe engiziledi. Sonymen qatar salalyq memlekettik organdardyń basshylary úshin negizgi tıimdilik kórsetkishteri (KPI) belgilenedi. Reıtıngti qalyptastyrý ádistemesin Týrızm jáne sport mınıstrligi ázirleıdi.
Jańartylǵan tujyrymdamada óz betinshe saıahattaýdy damytýǵa erekshe nazar aýdarylǵan. Atap aıtqanda, Tourism Village jobasy aıasynda aýyldyq eldi mekenderdiń týrıstik áleýetin damytý, at týrızmi baǵyttaryn ázirlep, olardy arnaıy belgilermen jabdyqtaý jáne jolsiltegishter ornatý, «Jandy sabaqtar» jobasy arqyly balalar men jasóspirimder týrızmin damytý, sondaı-aq Ulttyq týrıstik is-sharalar kúntizbesin qalyptastyrý kózdelgen.
Tujyrymdamany iske asyrý nátıjesinde 2029 jylǵa qaraı týrızm salasynyń jalpy qosylǵan qunyn 6,3 trln teńgege deıin jetkizý, ornalastyrý jáne qoǵamdyq tamaqtandyrý salasyna tartylatyn ınvestıtsııa kólemin 260 mlrd teńgege deıin ulǵaıtý, sondaı-aq salada jumyspen qamtylǵandar sanyn 800 myń adamǵa jetkizý josparlanyp otyr.
Sonymen qatar 2029 jylǵa qaraı ishki týrıster sanyn 11 mıllıonnan asyrý, al sheteldik týrıster sanyn 4 mıllıon adamǵa jetkizý kózdelgen. Sondaı-aq Qazaqstannyń Dúnıejúzilik ekonomıkalyq forýmnyń Saıahat jáne týrızmdi damytý ındeksi boıynsha álemdegi úzdik 50 eldiń qataryna enýi josparlanyp otyr.
Jańartylǵan tujyrymdamany iske asyrý týrıstik salanyń básekege qabilettiligin arttyrýǵa, týrıstik ınfraqurylymdy jaqsartýǵa, ınvestıtsııa kólemin ulǵaıtýǵa, salany tsıfrlandyrýdy jedeldetýge jáne ishki ári kelý týrızminiń turaqty ósimin qamtamasyz etýge múmkindik beredi.
Aıta ketelik Qazaqstan týrızm jáne qonaqjaılyq salasynda Taıland tájirıbesin meńgerýge nıetti.
