Týrızm salasy damyp keledi: 2025 jyly elimizde negizgi kórsetkishter boıynsha oń ósim tirkeldi
ASTANA. KAZINFORM – 2025 jyldyń qorytyndysy boıynsha Qazaqstannyń týrızm salasy negizgi kórsetkishter boıynsha turaqty ósim kórsetti. El ishinde saıahattaýshylar sany da, shetelden keletin týrıster aǵyny da artty. Sonymen qatar ınvestıtsııa men bıznes kiristeri de edáýir kóbeıdi.
Atap aıtqanda, ornalastyrý oryndarynda toqtaǵan ishki týrıster sany 10,1 mln adamǵa jetip, 2024 jylmen salystyrǵanda shamamen 1 mln-ǵa artty. Sheteldik qonaqtardyń da qyzyǵýshylyǵy ósip keledi: qonaqúı qyzmetin paıdalanǵan týrıster sany 1,4 mln adamdy qurap, ótken jylmen salystyrǵanda 132,3 myńǵa kóbeıdi.
Jalpy, 2025 jyly Qazaqstanǵa túrli týrıstik maqsatpen (jumys isteý nemese turaqty turý úshin kelgenderdi eseptemegende) 15,7 mln shetel azamaty keldi. Onyń ishinde 11,1 mln adam týrıst retinde tirkeldi. Bul kórsetkish te ótken jylmen salystyrǵanda joǵary.
Salanyń ekonomıkalyq tıimdiligi de artyp keledi. Ornalastyrý oryndary, demalys bazalary men qonaq úılerdiń jalpy kirisi 350,6 mlrd teńgeni qurap, bir jylda 50,8 mlrd teńgege ulǵaıdy. Týrıstik ınfraqurylym keńeıip, ornalastyrý nysandarynyń sany 4 482-ge jetti. Bir mezette qabyldaý múmkindigi 233 myńnan astam tósek-oryndy qurady.
Investıtsııalyq belsendilik te kúsheıdi. 2025 jyly týrızm salasyna tartylǵan ınvestıtsııa kólemi 32,6%-ǵa ósip, 1 256,9 mlrd teńgege jetti (2024 jyly – 947,6 mlrd teńge).
Jalpy kórsetkishterdiń artýy týrızm salasynyń júıeli túrde damyp kele jatqanyn jáne Qazaqstannyń ishki ári sheteldik týrıster úshin tartymdylyǵy kúsheıip otyrǵanyn aıǵaqtaıdy.
Buǵan deıin elimizde týrızm salasynda kásibı mamandar jetispeıtinin jazǵanbyz.
