Týrızm salasy boıynsha halyqaralyq grantqa ótinim qabyldaý bastaldy
ASTANA. KAZINFORM — Qazaqstan azamattary úshin Bachelor of Science in International Sustainable Tourism oqý baǵdarlamasyna qatysatyn úmitkerdi irikteý bastaldy. Baǵdarlama 2026–2028 jyldarǵa arnalǵan jáne Shveıtsarııadaǵy Lucerne University of Applied Sciences and Arts ýnıversıtetinde júzege asyrylady. Bul týraly «Halyqaralyq baǵdarlamalar ortalyǵy» AQ málimdedi.
Baǵdarlama Dúnıejúzilik týrıstik uıymnyń (UN Tourism) qoldaýymen, sondaı-aq Lucerne University of Applied Sciences and Arts (HSLU, Lıýtsern, Shveıtsarııa) jáne Halyqaralyq týrızm akademııasynyń (International Tourism Academy) seriktestigimen, Qazaqstan Respýblıkasy Týrızm jáne sport mınıstrligi men «Astana-20» memlekettik qorynyń qoldaýymen ótkiziledi.
Konkýrs jeńimpazyna oqý granttary beriledi, sondaı-aq turý jáne áýe bıleti shyǵyndary ishinara óteledi:
- 1-jyl — Madrıdte (Ispanııa) oqý aqysy tolyq tólenedi (turý shyǵyndary qarastyrylmaǵan);
- 2-jyl — onlaın formatynda oqý jáne taǵylymdamadan ótý, oqý aqysy tolyq tólenedi;
- 3-jyl — Lıýtsernde (Shveıtsarııa) oqý aqysy tolyq tólenedi, sondaı-aq turý shyǵyndary (12 114 eýro) jáne áýe bıleti (300 eýro) óteledi.
Baǵdarlamany aıaqtaǵannan keıin túlek Qazaqstanǵa oralyp, týrızm salasynda keminde úsh jyl jumys isteýge mindetti.
Úmitkerlerge qoıylatyn talaptar:
— jalpy orta, tehnıkalyq nemese kásiptik bilim;
— aǵylshyn tilin keminde C1 deńgeıinde bilý (IELTS, TOEFL nemese balamaly sertıfıkat);
— ýájdemelik hat;
— Qazaqstan Respýblıkasynyń azamattyǵy.
Qajetti qujattar tizimi:
— bilim týraly qujattyń qosymshasymen kóshirmesi;
— aǵylshyn tili deńgeıin rastaıtyn sertıfıkat;
— ýájdemelik hat;
— túıindeme (CV);
— jeke kýálik nemese pasport kóshirmesi.
Konkýrsqa qatysý úshin qujattardy 2026 jylǵy 20 mamyrǵa deıin bakytova17leila@gmail.com elektrondyq poshtasyna jiberý qajet.
Eske sala keteıik, buǵan deıin «Bolashaq» baǵdarlamasynyń shákirtaqysy 10-15 paıyzǵa artýy múmkin ekenin jazdyq.
