Týrızm salasy: Aqmola oblysynda 41, Mańǵystaýda 33 týrıstik nysan tekserildi
ASTANA. KAZINFORM — Týrızm jáne sport mınıstrligi elimizdiń týrıstik óńirlerine jasalǵan ınspektsııalyq saparyn aıaqtady. Atalǵan jumys Memleket basshysynyń tapsyrmasyn oryndaý maqsatynda júrgizilip, kýrorttyq ınfraqurylymdy júıeli jańǵyrtýǵa, týrıstik qyzmetterdiń qaýipsizdigi men sapasyn arttyrýǵa baǵyttalǵan.
Jumys toby Aqmola, Qaraǵandy, Mańǵystaý, Pavlodar, Shyǵys Qazaqstan, Almaty oblystary men Abaı jáne Jetisý oblystaryndaǵy týrıstik nysandardy aralap shyqty.
— 13-16 shilde kúnderi Aqmola oblysyndaǵy Şýche-Býrabaı jáne Zerendi kýrorttyq aımaqtarynda 41 týrıstik nysan tekserildi. Atap aıtqanda, demalys oryndaryndaǵy jaǵajaılar, qaıyq stantsııalary, attraktsıondar men sanıtarlyq toraptar qamtyldy. Sonymen qatar bıylǵy naýryzda Úkimet bekitken Şýche-Býrabaı kýrortty óńirin damytý jónindegi keshendi jospardyń oryndalý barysy baǵalandy. Atalǵan qujat 12 negizgi baǵyt boıynsha 118 is-sharany qamtıdy. Olardyń qatarynda logıstıka, tsıfrlandyrý, qorshaǵan ortany qorǵaý jáne qyzmet kórsetý sapasyn arttyrý syndy salalar bar, — delingen mınıstrlik habarlamasynda.
Sondaı-aq osy kezeńde Mańǵystaý oblysynda da tekserý jumystary júrgizildi. Aqtaý, Jańaózen, Qaraqııa, Munaıly jáne Túpqaraǵan aýdandaryndaǵy 33 demalys bazasy men jaǵajaı tekserildi. Nysandardyń sanıtarlyq jaǵdaıy, demalýshylardyń qaýipsizdigi, sondaı-aq sý qorǵaý aımaqtaryndaǵy normalardyń saqtalýy zerdelendi. Taldaý qorytyndysy boıynsha mınıstrlik Mańǵystaý oblysyn damytý jónindegi Jol kartasyna kommýnaldyq jaǵajaılar men jaǵalaý ınfraqurylymyn damytý jónindegi usynystardy engizýdi usyndy. Qazirgi ýaqytta qujat daıyndalyp jatyr.
Jergilikti atqarýshy organdarǵa anyqtalǵan kemshilikterdi joıý, ınfraqurylymdy jaqsartý jáne qyzmet kórsetý sapasyn arttyrý boıynsha naqty tapsyrmalar berildi.
Aıta keteıik, buǵan deıin Týrızm jáne sport mınıstri Erbol Myrzabosynov Premer-mınıstrdiń orynbasary Ermek Kósherbaevtyń basshylyǵymen ótken úkimettik delegatsııa quramynda Alakól men Balqash kólderiniń jaǵalaýlaryn jáne Qapshaǵaı aımaǵyndaǵy týrıstik nysandardy aralaǵan bolatyn. Sapar qorytyndysy boıynsha jergilikti bılikke naqty mindetter júktelip, ózekti máseleler erekshe baqylaýǵa alyndy.
Jumys saparlarynyń nátıjesinde Týrızm jáne sport mınıstrligi týrıstik salany júıeli damytý jáne anyqtalǵan máselelerdi sheshý maqsatynda Jol kartasyn ázirleýge kiristi. Onda qaýipsizdik, sanıtarlyq talaptardyń saqtalýy, tabıǵı resýrstardy turaqty paıdalaný jáne qyzmet kórsetý sapasyn arttyrýǵa basa mán beriledi. Bul baǵyttaǵy jumystar jergilikti ákimdiktermen, tıisti memlekettik organdarmen jáne bıznes ókilderimen birlese atqarylady.
Aıta ketelik kýrorttyq aımaqtardy ınspektsııalaý jumysy nátıjesinde sharalar qabyldanyp, birqatar laýazymdy tulǵa jaýapkershilikke tartylǵan edi.