Týrızm problemalaryn sheshýge jaýapty Jedel úılestirý keńesi qurylady

ASTANA. KAZINFORM – Úkimet janynan týrızm problemalaryn sheshýge jaýapty Jedel úılestirý keńesi qurylady.  Premer-mınıstr Oljas Bektenov ol keńesti orynbasary Aıda Balaeva basqaratynyn aıtty.

- Táýlik boıy jumys isteıtin medıtsınalyq beketterdi, quqyq qorǵaý organdary men qutqarý qyzmetterin uıymdastyrý isi barlyq jerde birdeı sheshimin tappaı keledi. Qonaq úılerde, týrıstik nysandarǵa jaqyn dámhanalar men dúkenderde baǵalar sol kúıi qymbat. Shashylyp jatqan qoqystarǵa, demalys oryndaryna aparatyn joldar men kólik turaqtarynyń joqtyǵyna qatysty týrıster tarapynan túsip jatqan shaǵym kóp. Osyndaı máselelerdi sheshý úshin barlyq ákimdiktiń, «Atameken» palatasynyń, ár óńirden týrızm salasyndaǵy iri kásipkerlerdiń, sondaı-aq tıisti sarapshylardyń qatysýymen Jedel úılestirý keńesin qurý qajet. Oǵan Aıda Ǵalymqyzy basshylyq etedi, - dedi úkimet basshysy.

Úılestirý keńesi bir aı ishinde týrızmdi damytý tujyrymdamasyna arnalǵan is-qımyl josparyn jańartýmen aınalyspaq.

- Memlekettik organdardyń birinshi basshylary úshin tıisti ındıkatorlardy qarastyryp, týrıstik bıznesti qoldaýdyń naqty ári tıimdi sharalaryn ázirleý kerek. Ári qaraı týrıstik maýsymdy jedel qamtamasyz etý barysy jergilikti jerlerde ár oblystaǵy jedel shtabtardyń baqylaýymen júzege asyrylady, - dedi Oljas Bektenov.

Sondaı-aq, ol «Kazakh Tourism» basshysy Talǵat Ǵazızovke laýazymyna laıyq ekenin dáleldeý úshin nátıje kórsetý kerektigin eskertti.