Týrızm kúni: Qazaqstanǵa 7,5 mıllıon sheteldik saıahattap kelgen
ASTANA. KAZINFORM — 27 qyrkúıekte Dúnıejúzilik týrızm kúni atalyp ótedi. Qazaqstanda da ishki jáne syrtqy týrızm kórsetkishteri jyldan-jylǵa artyp keledi. Elimizdiń ekotýrızm, taý-shańǵy, mádenı-tanymdyq, medıtsınalyq, sporttyq, iskerlik, tipti ǵarysh týrızminde áleýeti zor.
Búginde Qazaqstanǵa 87 eldiń azamattary vızasyz kire alady, al 30 memleketpen tikeleı áýe reısteri ashylǵan. Keler jyldary Tokıo, Sıngapýr, Nıý-Iork qalalaryna ushaq qatynaı bastaıdy.
QR Týrızm jáne sport mınıstrliginiń habarlaýynsha, byltyr elimizge 15 mıllıonnan astam týrıst kelgen. Al bıyl jyl basynan beri 7,5 mıllıon sheteldik týrıstik maqsatta kelgen.
– Týrızm salasyna qyzyǵýshylyq artqanyn kásipkerlerdiń ınvestıtsııa salǵanynan baıqap otyrmyz. Osy jartjyldyqta jeke kásipkerler 600 mlrd teńgege deıin qarajat salǵan bolatyn. Atalǵan kórsetkish byltyrmen salystyrǵanda 27 paıyzǵa artyp otyr. Demek, bul jerlerde jańa jumys oryndary paıda bolady, ol arqyly jergilikti jerge salyq ósimi bolady. Sondyqtan týrızmniń ekonomıkaǵa tikeleı paıdasy bar. Adamdar tek qonaq úıde turmaıdy, saıahattaıdy, kólik jaldaıdy, tamaqtanady. Odan kásipkerler mol paıda tabady, – deıdi Týrızm jáne sport mınıstrligi týrızm ındýstrııasy komıtetiniń tóraǵasy Nurtas Káripbaev.
Al QR UEM Ekonomıkalyq zertteýler ınstıtýty óńirler bólinisinde eń tartymdy baǵyt dástúrli túrde Almaty qalasy ekenin aıtyp otyr. Munda sheteldik týrısterdiń 53%-y jáne ishki týrısterdiń 21%-y keledi. Al eń az týrıst Ulytaý oblysynda tirkelgen. Onyń úlesine sheteldik týrısterdiń nebári 0,08%-y jáne ishki týrısterdiń 0,38%-y tıesili. Bul jaǵdaı týrıstik ónimderdi ártaraptandyrý men tanymal emes baǵyttardy ilgeriletý qajettigin kórsetedi.
Mamandardyń aıtýynsha, týrızm qonaq úı, kólik, tamaq, saýda, jeńil ónerkásip, qarjy, kommýnıkatsııa sekildi otyzdan astam salanyń damýyna tikeleı yqpal etedi. Ornalasý oryndarynda qyzmet alǵan kelýshiler sany jyl saıyn artyp keledi. Bul Qazaqstannyń týrızm salasynda jaǵymdy úrdister qalyptastyryp jatqanyn dáleldeıdi. Sonyń biri – eldiń halyqaralyq deńgeıdegi pozıtsııasynyń jaqsarýy.
2024 jyly Qazaqstan Dúnıejúzilik ekonomıkalyq forýmnyń Saıahat jáne týrızmdi damytý ındeksinde 119 eldiń ishinde 52-orynǵa kóterilip, 2021 jylmen salystyrǵanda 6 satyǵa joǵarylady. Bul kórsetkish boıynsha Qazaqstan Ortalyq Azııa elderiniń ishinde alda keledi: Ózbekstan – 78-orynda, Tájikstan – 99-orynda, Qyrǵyzstan – 102-orynda tur.
Qazaqstan týrızmdi damytýda birqatar oń nátıjelerge qol jetkizip jatyr. Alaıda eldiń tolyq týrıstik áleýetin ashý úshin týrıstik ónimderdi ártaraptandyrý, kóliktik qoljetimdilikti jaqsartý, el brendin halyqaralyq deńgeıde nasıhattaý jáne Ortalyq Azııa elderimen birlesken týrıstik marshrýttardy ázirleý qajet.
Bıyl jazda Memleket basshysy kýrorttyq aımaqtardaǵy ınfraqurylymdy synǵa alǵan bolatyn. Ásirese Alakól mańyndaǵy týrıstik aımaqqa halyqtan kóp shaǵym túskenin aıtyp, Úkimetke qysqa merzimde retke keltirýdi tapsyrdy.
Óz kezeginde Abaı oblysy týrıstik áleýetti birden qolǵa aldy. Aımaqta iri qonaqúı men sanatorıı qurylysy bastaldy. Alakólde týrıstik ındýstrıaldyq aımaq qurylady. Qazirdiń ózinde Ázerbaıjan, Qytaı, Reseı ınvestorlary óńir týrızmine qyzyǵýshylyq tanytyp otyr.
– Prezıdent tapsyrmalary men syn-eskertpelerin júzege asyrý úshin aýqymdy jumystar júrgizilip jatyr. Bıylǵy maýsymda týrıstik oryndardy kútip-ustaýǵa 658 mıllıon teńge bólindi. Onyń ishinde remont jasaý, abattandyrý, jańa pırstar ornatý, qutqarý vyshkalaryn qoıý, maýsym boıy sanıtarlyq kútip-ustaýǵa, joldaýdy jóndeýge aqsha bólindi. Al endi ınfraqurylymdyq aýqymdy máselelerge kelsek, olardy bir maýsymda sheshý múmkin emes. Qazir Alakólde úsh aýqymdy másele bar – jaǵajaıdy nyǵaıtý, qatty turmystyq qaldyqtar polıgony jáne elektr máselesi. Osy úsh joba boıynsha jobalyq-smetaldyq qujattama daıyndalyp, jyl aıaǵyna deıin memlekettik saraptamadan ótedi. Kelesi jyly Úkimetten aqsha bólingen soń, bul jumystar bastalady, – dep túsindirdi Abaı oblysy týrızm basqarmasynyń basshysy Marat Qabaqov.
Aıta keteıik, Qazaqstanda álemdik qonaqúı brendteriniń qatary keńeıtilip jatyr. Aldaǵy jyldary ishinde eldiń 11 óńiri men qalasynda halyqaralyq deńgeıdegi 24 jańa qonaqúı salý josparlanyp otyr.
Dımash Qudaıbergen men Qytaıdyń Hunan Broadcasting System birlese júzege asyryp jatqan halyqaralyq televızııalyq joba Qazaqstannyń týrıstik áleýetin álemdik aýdıtorııaǵa tanystyryp jatyr.
Qazaqstandyq Neo Nomad vızasy arqyly 14 shet memlekettiń 27 azamaty elimizde bir jyl merzimge turýǵa múmkindik aldy.