Týrızm komıteti qańtarda Qazaqstanǵa charterlik tasymal máselesi boıynsha dıalog alańyn uıymdastyrady
ASTANA. 19 qańtar. QazAqparat - QR Indýstrııa jáne jańa tehnologııalar mınıstrliginiń Týrızm ındýstrııasy komıteti elimizge týrısterdi charterlik tasymaldaý máselesi boıynsha qazaqstandyq týroperatorlar men avıatsııalyq kompanııalar arasynda dıalog alańyn uıymdastyrady.
Atalǵan komıtet málimetine qaraǵanda, jaqynda mınıstrlikte ótken keńeste aldaǵy týrıstik maýsymǵa oraı Qazaqstanǵa charterlik áýe tasymaldaryn uıymdastyrý sharalary qaraldy.
Esterińizge sala keteıik, túrkııalyq «SKY» áýe kompanııasy bankrot bolýyna baılanysty jáne «QUALITUM TURISM» týroperatorynyń qarjylyq qıyndyqtary saldarynan 2013 jyldyń maýsymynda qazaqstandyq azamattar elge oralý turǵysynda keıbir aýyrtpalyqtardy sezindi.
Osyǵan baılanysty mınıstrlik júıeli túrde iske asyrylmaıtyn halyqaralyq áýe baılanystarǵa baılanysty ruqsatnamalardy berý normalaryn qaıta qarastyrǵan edi.
Taıaýda Úkimet basshysynyń orynbasary-Indýstrııa jáne jańa tehnologııalar mınıstri Áset Isekeshevtiń tapsyrmasy boıynsha «QUALITUM TOURISM» týroperatorynyń bankrottyǵy saldarynan qazaqstandyq týrıstik fırmalar men azamattardyń qarjylyq shyǵynyna baılanysty jaǵdaıda retteýge arnalǵan keńes ótti. Qazirgi kezde Týrızm ındýstrııasy komıteti men Qazaqstandyq týrıstik qaýymdastyǵy QR Bas prokýratýrasymen atalǵan máseleni sheshý úshin júıeli jumystardy atqarýda.
