Týrızm: 2025 jyly 80 mekeme «Sapa belgisin» ıelendi

ASTANA. KAZINFORM — 2025 jyly «Kazakh Tourism» ulttyq kompanııasy týrıstik sala ókilderinen «Sapa belgisi» baǵdarlamasyna qatysýǵa 94 ótinim qabyldady. Keshendi baǵalaý men daýys berý qorytyndysy boıynsha 80 kásiporyn talapqa saı ekenin rastaǵan. 

«Sapa belgisi» baǵdarlamasy 2021 jyly «Kazakh Tourism» kompanııasynyń bastamasymen iske qosyldy. Onyń basty maqsaty — qonaqjaılylyq mádenıetin jáne týrıstik qyzmetterdiń sapasyn arttyrý. 

— Osy ýaqyt aralyǵynda 290 kompanııa óz qyzmetiniń ulttyq jáne halyqaralyq standarttarǵa negizdelgen baǵdarlama talaptaryna sáıkestigin rastady. «Sapa belgisi» «Very Nice» jáne «Nice» syndy eki deńgeı boıynsha beriledi, — delingen habarlamada.

Bıyl ótinimderdiń basym bóligi Astana jáne Almaty qalalarynan, Túrkistan jáne Almaty oblystarynan joldandy.

Kompanııanyń málimetinshe, ótinimder 5 sanat boıynsha qabyldanǵan: «Ornalastyrý oryndary», «Tamaqtaný oryndary», «Týroperatorlar», «Gıdterdi oqytý» jáne «Halal-týrızm salasyndaǵy nysandar». «Sapa belgisi» ıegerleriniń basym bóligi ornalastyrý jáne qoǵamdyq tamaqtaný segmentterine tıesili . 

Qatysýshylardy irikteý rásimi memlekettik organdar men óńirlik kásipkerler palatalary ókilderinen quralǵan jumys tobynyń baǵdarlama talaptaryna sáıkestigin mindetti tekserýdi qamtıdy.

Eske sala keteıik, búgin Úkimet basshysy Týrızmdi damytý tujyrymdamasyn túzetýdi mindettedi.