Týrıstsizder me - oqý-jattyǵýǵa Nıderland eline barǵan boks bapkerleri synǵa qaldy
«Bapkerler keńesi shetelge shyǵatyn oqý-jattyǵý jıyndaryna qarańyzdar. Sizderdiń geografııalaryńyz (oqý-jattyǵý jıynyn ótkizýde tańdalatyn memleket) qandaı qaǵıdatpen belgilenetini túsiniksiz. Kórshi ózbek quramasyn bilesizder, keremet komanda. Men sizderden Ózbekstanda ne bolyp jatqanyna taldaý júrgizip kórýdi ótingen bolatynmyn. Ol qalaı dúr silkindi? Ol jaqta boksqa qyzyǵýshylyq bir mezette qalaısha sharyqtap ketti? Ózbekstan shynynda da myqty komanda ázirlep, keremet nátıje kórsete bastady. Sizder bolsańyzdar, eshqandaı taldaý júrgizbedińizder, jaýap ta bere almaı otyrsyzdar. Oqý-jattyǵý úshin Gollandııa eline bara jatyr ekensizder. Ol jaqta ne isteısizder? Baryńdar da ózbektermen tóbelesińder. Olımpıadaǵa baryp daıyndalyńdar! Senderdiń naǵyz sparrıng-qarsylastaryń sol jaqta», - dedi Tımýr Qulybaev Qazaqstan boks federatsııasynyń otyrysynda.
Onyń aıtýynsha, qazaq boksshylar kúni erteń Tokıo Olımpıadasynda ózbek jáne orys boksshylarymen altyn medalǵa talasatyn bolady.
«Gollandııadan ne joǵaltyp aldyńyzdar? Týrıstsizder me? Bekjan (Bektenov – federatsııanyń atqarýshy dırektory) talapty álsiretpeńder! Aqshanyń bárin ıgerýge jumsap, adamdar aqyry ary-beri sandalyp júr. Reseıde qanshama myqty boksshylar bar. Ol jaqta nege oqý-jattyǵý jıyndaryn ótkizbeske? Kýbalyqtar bar. Olar da Olımpıadada erteń eń joǵary dárejede óner kórsetedi. Nelikten olarmen sparrıng ótkizbeısizder. Sizder týrıst emes, Olımpıada chempıondaryn daıyndaıtyn adamsyzdar. Olardy laıyqty qarsylastarǵa qarsy qoıyńdar. Sapar kestesin qaıta qarańdar! Bul meniń tapsyrmam» - dedi Tımýr Qulybaev.
Eske sala ketsek, Qazaqstan boks federatsııasynyń búgingi otyrysynda Tımýr Qulybaev atalmysh federatsııa basshylyǵynan ketetinin málimdegen bolatyn.
Onyń ornyna belgili qazaqstandyq bıznesmen Keńes Raqyshev saılandy.