«Týrıstke arnalǵan sos-batyrma» qaýipsizdik júıesi engiziledi
ASTANA. KAZINFORM – Internetpen qamtylmaǵan aımaqtarda «Týrıstke arnalǵan sos-batyrma» qaýipsizdik júıesi engiziledi. Bul týraly búgin Úkimet otyrysynda Týrızm jáne sport mınıstri Ermek Marjyqpaev aıtty.
«Ekotýrızmge suranystyń artýyn eskere otyryp, ulttyq saıabaqtarǵa barý kórsetkishteriniń ósýi baıqalady. Ótken jyldyń qorytyndysy boıynsha ulttyq saıabaqtarǵa 2,4 mıllıonnan astam adam keldi. Búginde Qazaqstan boıynsha 16 vızıt-ortalyq jumys isteıdi, onyń ishinde 7-eýi ulttyq parkter aýmaǵynda ornalasqan. Ótken jyly Altyn-Emel, Sharyn jáne Іle-Alataýy ulttyq parkteri jalpy quny 3 mlrd teńgege jýyq 3 jańa vızıt-ortalyqpen tolyqtyryldy», - dedi ol.
Mınıstr aldaǵy jazǵy maýsym qarsańynda azamattar men týrıster úshin qaýipsizdikti saqtaý óte mańyzdy ekendigin aıtty.
«Sondyqtan jergilikti atqarýshy organdar sýdaǵy jazataıym oqıǵalardyń aldyn alý, sý aıdyndary men taýly jerlerde qaýipsizdikti arttyrý jóninde sharalar qabyldaýy qajet. Mınıstrlik ınternetpen qamtylmaǵan aımaqtarda jumys isteıtin «Týrıstke arnalǵan SOS-batyrma» qaýipsizdik júıesin engizý máselesin pysyqtaýda. Bul otandyq ázirleme sanalady», - dedi Ermek Marjyqpaev.
