Týrıstik statıstıkaǵa tyń qadam: smartfon arqyly esep júrgiziledi

ASTANA. KAZINFORM — Memleket basshysynyń týrıstik statıstıkanyń naqtylyǵyn arttyrý jónindegi tapsyrmasyn oryndaý aıasynda Astanada Týrızm jáne sport mınıstri Erbol Myrzabosynov pen QR Strategııalyq josparlaý jáne reformalar agenttigine qarasty Ulttyq statıstıka bıýrosy basshylyǵymen jumys kezdesýi ótti. Bul týraly vedomstvonyń baspasóz qyzmeti málim etti.

Kezdesý barysynda Bıýro 2024 jylǵa arnalǵan ishki týrızmdi uıaly qurylǵynyń ornalasýyn anyqtaý arqyly baǵalaý jónindegi pılottyq jobanyń nátıjelerin tanystyrdy. Qazaqstanda alǵash ret resmı esepke alý aıasynda baılanys operatorlarynyń derekteri ishki týrıstik aǵyndy taldaý úshin paıdalanyldy.

Erbol Myrzabosynov tsıfrlyq derekkózderge kóshý qazirgi esep júıesindegi olqylyqtardy joıyp, eldegi shynaıy týrıstik belsendiliktiń kórinisin qalyptastyrýǵa múmkindik beretinin atap ótti. Bul óz kezeginde ınfraqurylymdy tıimdi josparlaýǵa, ınvestıtsııa tartýǵa jáne týrıstik qyzmetterdiń sapasyn arttyrýǵa negiz bolmaq.

— Baılanys operatorlarynan alynǵan derekterdi paıdalana otyryp statıstıka júrgizý — Memleket basshysy júktegen mindetterdi júzege asyrýdaǵy mańyzdy qadam. Bul tásil salanyń damý strategııasyn júıeli josparlaýǵa jol ashady. Atap aıtqanda, sanıtarııalyq-gıgıenalyq toraptarǵa degen suranysty esepteýge, kýrortty óńirlerdegi júktemeni anyqtaýǵa, ınfraqurylymdyq nysandardyń qurylysyn josparlaýǵa, sondaı-aq óńirdiń ınvestıtsııalyq tartymdylyǵyn baǵalaýǵa múmkindik beredi, — dedi mınıstr.

Uıaly baılanys operatorlarynyń derekterin paıdalaný qysqa merzimdi saparlar men túnemeıtin saıahattardy esepke alyp, týrıstik aǵyndy neǵurlym shynaıy baǵalaýǵa múmkindik beredi.

— Uıaly derekterdiń arqasynda týrızm statıstıkasy jańa deńgeıge kóterilýde. Qazaqstan — TMD elderiniń ishinde uıaly baılanys operatorlarynyń derekterin resmı statıstıkada qoldanýdy alǵash bolyp engizgen memleket bolmaq. Bul jańashyl tásil halyqtyń, onyń ishinde ishki týrısterdiń qozǵalysy týraly neǵurlym naqty, jedel ári shynaıy aqparat alýǵa múmkindik beredi, — dedi Ulttyq statıstıka bıýrosynyń basshysy Maqsat Turlybaev.

Mundaı tásildiń tıimdiligi halyqaralyq tájirıbe arqyly dáleldengen. Osyǵan uqsas tájirıbe qazirgi tańda Saýd Arabııasy, Indonezııa, Oman jáne Estonııa elderinde sátti iske asyrylǵan.

Aıta keteıik, Qytaıdan Qazaqstanǵa kelgen týrıster sany 78% kóbeıgen.