Týrıstik is-sharalar kúntizbesi: sáýirde qaı óńirlerge barǵan durys
ASTANA. KAZINFORM — Sáýir aıynda elimizde birqatar aýqymdy týrıstik is-shara josparlanǵan, dep habarlaıdy Týrızm jáne sport mınıstrliginiń baspasóz qyzmeti.
Bul aıda Qazaqstan otandyq jáne sheteldik týrısterdi kitap, qolóner jáne tehnologııa álemin biriktiretin jarqyn oqıǵalarmen qarsy alady.
— 22–26 sáýir kúnderi Astanada Eurasian Book Fair halyqaralyq kitap kórmesi ótedi. Kórme aıasynda jańa kitaptardyń tanystyrylymy, avtorlarmen kezdesýler jáne bilim berý sessııalary uıymdastyrylady.
— 23–24 sáýirde Jambyl oblysynda «Taraz — qolónershiler qalasy» etnomádenı festıvali uıymdastyrylady. Qonaqtar qolóner kóshesin aralap, sheberlik sabaqtaryna qatysyp, halyq sheberleriniń biregeı týyndylarymen tanysa alady.
— 26 sáýirde Qostanaı oblysynda alǵash ret TechTrail Qostanai otbasylyq tehno-festıvali ótkiziledi. Baǵdarlamaǵa ınjenerlik kvestter, ınteraktıvti zerthanalar jáne óndiris oryndaryna ekskýrsııalar engen.
Eske sala keteıik, bıyl el boıynsha 55 iri mádenı-týrıstik is-shara josparlanǵan.
Budan buryn habarlanǵandaı, elimizde týrızm salasynda kásibı mamandar jetispeıdi.
