Týrıstik marshrýttardy damytý úshin avtojoldardyń biryńǵaı tizilimin ázirleý kerek — Qajybekova
ASTANA. KAZINFORM — Quryltaı otyrysynda depýtat Ajar Qajybekova Premer-mınıstrge saýal joldap, týrıstik áleýetti tolyq iske asyrý úshin avtojoldardy týrıstik ınfraqurylymnyń bir bóligi retinde qarastyrýdy usyndy.
Depýtattyń aıtýynsha, Qazaqstanda ishki týrızmge suranys artyp keledi. Memleket basshysy Qasym-Jomart Toqaev ta ishki týrızmdi damytý, óńirlerdiń týrıstik tartymdylyǵyn arttyrý jáne zamanaýı ınfraqurylym qalyptastyrý qajettigin birneshe ret atap ótken.
— Búginde Qazaqstannyń týrıstik áleýeti mol. Alaıda ony tolyq iske asyrý úshin tásildi ózgertý qajet. Jekelegen týrıstik nysandardy ǵana damytpaı, olardy ózara baılanystyratyn tolyqqandy týrıstik marshrýttardy qalyptastyrýymyz kerek, — dedi Ajar Qajybekova.
Depýtat keltirgen málimetke sáıkes, 2025 jyldyń qorytyndysynda týrızmniń Qazaqstan ekonomıkasyna qosqan úlesi shamamen 5 trln teńgeni quraǵan. Salada 600 myńnan astam adam jumyspen qamtylyp, salyq túsimderi 630 mlrd teńgeden asqan. Týrızmge salynǵan ınvestıtsııa kólemi 1,3 trln teńgege jetken. Ótken jyly Qazaqstanda 11,7 mln-nan astam týrıstik sapar jasalǵan. Onyń 10,2 mln-nan astamy ishki saparlarǵa tıesili. Іshki týrısterdiń 33,2 paıyzy jeke avtokóligin paıdalanǵan, al olardyń shyǵyny 1,1 trln teńgeden asqan.
— Bul kórsetkishter avtotýrızmge degen suranystyń qalyptasqanyn kórsetedi. Sondyqtan ishki joldarǵa tek kólik ınfraqurylymy retinde emes, týrıstik marshrýttardy qalyptastyratyn strategııalyq nysan retinde qaraý qajet, — dep atap ótti depýtat.
Máselen, Shyǵys Qazaqstan oblysynyń Rıdder qalasyna 2026 jyldyń birinshi toqsanynda shamamen 11 myń týrıst barǵan. Olardyń 11 paıyzy — sheteldik qonaqtar. Depýtattyń pikirinshe, óńirdegi jol ınfraqurylymynyń jaǵdaıy týrıstik aǵyndy arttyrýǵa tikeleı áser etedi. Osyǵan baılanysty «Aýyl» fraktsııasy birqatar ishki joldardy halyqaralyq týrıstik dáliz retinde qarastyrýdy usyndy. Atap aıtqanda, Shyǵys Qazaqstandaǵy Óskemen — Tarhanka — Topıha — Cheremshanka — Rıdder — Reseı Federatsııasynyń shekarasy, sondaı-aq Ulytaý oblysyndaǵy Astana — Barshyn — Jaırem — Ulytaý — Jezqazǵan — Sozaq — Túrkistan baǵyttaryn damytý usynylyp otyr.
Depýtattyń aıtýynsha, bul baǵyttardy jańǵyrtý jańa týrıstik marshrýttardy qalyptastyryp, tarıhı jáne tabıǵı nysandardy ózara baılanystyrýǵa múmkindik beredi. Sonymen qatar shaǵyn bıznes pen aýyl týrızmin damytýǵa jaǵdaı jasalyp, aýyl sharýashylyǵy ónimderiniń logıstıkasy jaqsarady.
— Jol tek bir qaladan ekinshi qalaǵa aparatyn baǵyt qana emes. Ol týrıstik nysandarǵa, ornalastyrý oryndaryna jáne shaǵyn bıznes damı alatyn aýmaqtarǵa jetkizetin ınfraqurylym bolýy kerek, — dedi Ajar Qajybekova.
Depýtat agrotýrızmniń áleýetine de nazar aýdardy. Onyń pikirinshe, qonaq úıler, fermerlik ónimder, ulttyq taǵamdar, atpen júretin týrıstik marshrýttar men qolóner aýyl turǵyndary úshin qosymsha tabys kózine aınala alady.
Sonymen birge depýtat ártúrli vedomstvolar men jergilikti atqarýshy organdardyń jumysy keı jaǵdaıda ózara úılestirilmeıtinin atap ótti. Onyń aıtýynsha, týrıstik jobalardy iske asyrýda biryńǵaı uzaq merzimdi jospar men naqty jaýapty tulǵalar aıqyndalýy qajet.
Osyǵan baılanysty «Aýyl» fraktsııasy Úkimetke mynadaı úsh usynys engizdi:
— óńirlerdiń týrıstik áleýetin keshendi damytýǵa múmkindik beretin avtojoldardyń biryńǵaı tizilimin ázirlep, ondaǵy baǵyttardy basym nysandar retinde aıqyndaý jáne tıisti jańǵyrtý jumystaryn júrgizý;
— «Tarhanka — Topıha — Cheremshanka» avtomobıl jolyn ishki jáne taý týrızmin damytýǵa baǵyttalǵan basym ınfraqurylymdyq pılottyq joba retinde aıqyndap, ony 2027 jyly iske asyrý múmkindigin qarastyrý;
— agrotýrızmdi úılestirý men júıeli damytýǵa jaýapty ýákiletti ortalyq memlekettik organdy aıqyndap, oǵan arnaıy ókilettikter berý.
Buǵan deıin depýtat Aısulý Súleımen pılotsyz avıatsııany damytý úshin biryńǵaı tsıfrlyq júıe qurýdy usynǵan edi.
