Týrıstik lokatsııalarda sapaly uıaly baılanys pen ınternet bolýy kerek – Premer-Mınıstr
ASTANA. KAZINFORM – Qazaqstanǵa kelgen týrısterge búkil sapar marshrýty boıynsha jáne elden ketkenshe qolaıly jaǵdaı jasaý qajet. Bul týraly QR Premer-mınıstri Oljas Bektenov Úkimet otyrysynda aıtty.
− Biz Qazaqstannyń sheteldik týrısterge dostyq peıili bar, emin-erkin demalýǵa qolaıly el retinde tartymdylyǵyn arttyrý úshin qajetti jaǵdaı jasaýymyz kerek. Bul baǵytta aýqymdy jumys atqarylyp jatyr. Halyqaralyq áýe qatynastarynyń, temirjol jáne avtokólik baǵyttarynyń geografııasy keńeıtilip jatyr. Sheteldik azamattar úshin kóshi-qon rásimderin jeńildetý qolǵa alyndy. Kelgen qonaqtardyń emin-erkin ári qaýipsiz demalysyna erekshe kóńil bólinip otyr, − dedi Premer-mınıstr.
Mysaly, Almaty, Shyǵys Qazaqstan jáne Jetisý oblystarynda kórshiles elderden kelgen týrısterdi qabyldaý jumystary júrgizildi. Úkimet basshysy bul tájirıbeni keńinen taratý qajettigin aıtty. Týrıstik ónimderdi naqty týrıstik toptardyń, ásirese shekaralas óńirlerdegi týrısterge beıimdegen jón.
− Munyń shaǵyn jáne orta bıznestiń qyzmetine ǵana emes, baǵdarlamalyq-tsıfrlyq ónimderge de qatysy bar. Týrıstik lokatsııalarda sapaly uıaly baılanys pen ınternet bolýǵa tıis. Qonaq úıler men týrıster jıi baratyn basqa da oryndarda qyzmet kórsetý sapasy men qaýipsizdik deńgeıine, sondaı-aq baǵa saıasatynyń qolaıly bolýyna nazar aýdarý kerek, − dedi O.Bektenov.
Ásirese, taýdaǵy demalysqa arnalǵan qural-jabdyqtar men kerek-jaraqtardy túgendep, týrısterdiń qaýipsizdik tehnıkasy týraly bilim deńgeıin arttyrýdy, týrıster úshin yńǵaıly ári qaýipsiz ınfraqurylym qurýdy baqylaýǵa alý keregi aıtyldy.
− Eń aldymen Týrızm mınıstrligi Tsıfrlyq damý mınıstrligimen birlesip, ulttyq týrıstik portaldyń, e-qonaq kóshi-qon servısiniń, taksı qyzmetteriniń jáne týrısterge arnalǵan basqa da paıdaly resýrstardyń fýnktsıonalyn keńeıtýi kerek. Ekinshiden, Іshki ister, Tótenshe jaǵdaılar, Densaýlyq saqtaý mınıstrlikteri týrısterdiń qaýipsizdik sharalaryn kúsheıtip, shetel azamattary úshin kóptildi jedel jelini engizý máselesin pysyqtaýy qajet. Barlyq týrıstik lokatsııa kóptildi aqparatpen qamtylýǵa tıis, − dedi Úkimet basshysy.
Sonymen birge, Týrızm mınıstrligi múddeli memlekettik organdarmen jáne ákimdiktermen birlesip, bir aıda sheteldik týrısterdiń Qazaqstanda jaıly ári qaýipsiz bolýyn qamtamasyz etý boıynsha sharalar keshenin ázirleýi kerek.
Aıta keteıik, ótken jyly elimizge 15,3 mıllıon týrıst shetelden kelgen. Sondaı-aq, 10 mıllıonnan astam ishki týrıst el ishinde saıahattaǵan.
Qazaqstanǵa 87 eldiń azamaty vızasyz kele alady, taǵy 107 eldiń azamaty elektrondy vızamen kire alady.
Qazaqstanǵa kelgen týrısterge tegin SIM-karta berý usynyldy.
Sonymen birge, taýǵa ketken týrıst TJ qyzmetine habar berýge mindetteletin boldy.