«Týrıstik qyzmet týraly» zańnamaǵa ózgerister engiziledi
ASTANA. KAZINFORM – Elimizde týrıster men týrıstik toptardyń júrý baǵyttary týraly aqparattandyrý zań arqyly bekitilmek. Bul týraly Tótenshe jaǵdaılar mınıstrligi Tótenshe jaǵdaılardy joıý departamenti bastyǵynyń orynbasary Jomart Asqarov málim etti.
«Qys bastalǵaly qutqarý bólimsheleri 17 izdestirý-qutqarý jumystaryn júzege asyrdy. Іs-shara barysynda taýly jerlerde saıahattap júrgen 14 týrıst tabyldy, olar keri qaıtý baǵytyn joǵaltqan. Búgingi tańda «Týrıstik qyzmet týraly» zańǵa týrıster men týrıstik toptardyń júrý baǵyttary týraly aýmaqtyq bólimshelerdi aqparattandyrý bóligine ózgerister engizý máselesi pysyqtalýda», - dedi Jomart Asqarov Ortalyq kommýnıkatsııalar qyzmeti alańynda ótken baspasóz máslıhatynda.
Odan bólek, mınıstrlik ókili qar kóshkini jaǵdaıyna toqtalyp ótti.
«Qys bastalǵaly 29 myń sharshy metr kóleminde qar kóshkini boldy. Taýly aımaqtarda qaýipsizdikti qamtamasyz etý maqsatynda jalpy kólemi 75 myń tekshe metr qar túsirilip, 52 profılaktıkalyq is-shara uıymdastyryldy. Sondaı-aq qaýipti ýchaskelerde 108 eskertý qalqany qoıylǵan. Odan bólek jerústi zerttep, baqylaý jumystary júrgiziledi», - deıdi ol.
