Týrıstik aımaqtarda ámbebap qutqarý bólimsheleri ashylady
ASTANA. KAZINFORM — Búgin Úkimet otyrysynda QR Tótenshe jaǵdaılar mınıstri Shyńǵys Árinov qutqarý bólimsheleri qaı týrıstik aımaqtarda ashylatynyn aıtty.
— Qazir týrıstik aımaqtarda 42 órt sóndirý bólimi jáne 9 qutqarý stantsııasy jumys istep tur. Sonyń ishinde Alakól, Býrabaı, Úlken Shabaqty, Shalqar, Imantaý, Pestroe, Kólsaı kólderinde ornalasqan. Aldaǵy ýaqytta 9 ámbebap bólimshe ashamyz jáne 6 qutqarý stantsııasyn Balqash kóliniń, Qapshaǵaı, Buqtyrma sý qoımalarynyń jaǵasynda, Baıanaýyl kýrorttyq aımaǵynda iske qosamyz, — dedi Sh. Árinov.
Onyń aıtýynsha, qutqarý qyzmetteriniń áýe mobıldigin qamtamasyz etý maqsatynda avıatsııa ınfraqurylymy damyp keledi. Atap aıtqanda angarlar men tikushaq alańdary salynyp jatyr.
— Mamyr aıynda alǵash ret «Kólsaı kólderi» ulttyq parkiniń aýmaǵynda óz kúshimizben salynǵan tikushaq alańyn ashtyq. Bul joba zardap shekkenderdi evakýatsııalaý ýaqytyn jedeldetýge jáne qutqarý operatsııalaryn júrgizýdiń tıimdiligin arttyrýǵa múmkindik beredi. Osyndaı obektilerdi elimizdiń basqa da týrıstik oryndarynda salamyz. Osyǵan uqsas alań Almatydaǵy 4 qalalyq aýrýhananyń aýmaǵynda iske qosyldy, ol patsıentterdi tasymaldaý ýaqytyn aıtarlyqtaı qysqartyp, shuǵyl medıtsınalyq kómek kórsetýdiń tıimdiligin arttyrady, — dedi mınıstr.
Buǵan deıin demalys oryndaryndaǵy jaǵalaýlarǵa jasandy ıntellekt arqyly beınebaqylaý júıeleri engizilip jatqanyn jazǵan edik.
