Týrıstik aımaq pen jaǵajaıdy tańdaǵanda neni eskerý kerek
ASTANA. KAZINFORM – Jazǵy demalys maýsymynda jaǵajaı men týrıstik aımaqty tańdaǵanda onyń sanıtarııalyq jaǵdaıyna erekshe mán bergen jón. Bul týraly Ortalyq kommýnıkatsııalar qyzmetinde ótken brıfıngte QR Densaýlyq saqtaý mınıstrligi Sanıtarııalyq-epıdemıologııalyq baqylaý komıtetiniń tóraǵasy Sarhat Beısenova aıtty.
Onyń sózinshe, qaýipsiz demalys úshin eń aldymen jaǵajaı men jaǵalaý aýmaǵynyń tazalyǵyna nazar aýdarý qajet.
– Demalys ornyn tańdaǵanda jaǵajaıdyń sanıtarııalyq jaǵdaıyn baǵalańyzdar. Aýmaqta qoqys jáshikteri men qaldyqtarǵa arnalǵan konteınerlerdiń, qoǵamdyq dárethanalardyń, qaýipsiz aýyz sýdyń bolýy, aýmaqtyń turaqty tazartylyp turýy jáne jeke bas gıgıenasyn saqtaýǵa jaǵdaı jasalýy mańyzdy. Zańnamada kózdelgen jaǵdaıda nysannyń sanıtarııalyq-epıdemıologııalyq qorytyndysynyń bar-joǵyn da teksergen jón,– dedi Sarhat Beısenova.
Spıkerdiń aıtýynsha, turǵyndar sanıtarııalyq talaptardyń buzylǵanyn baıqasa, bul týraly Komıtettiń aýmaqtyq sanıtarııalyq-epıdemıologııalyq baqylaý departamentterine habarlaı alady.
– Sanıtarııalyq-epıdemıologııalyq qyzmet týrıstik aımaqtar men qoǵamdyq jaǵajaılardyń qaýipsizdigin turaqty baqylaýda ustaıdy. Bul jumys halyqtyń densaýlyǵyn qorǵaý jáne juqpaly aýrýlardyń aldyn alý úshin jalǵasady, – dedi komıtet tóraǵasy.
Aıta keteıik, buǵan deıin Densaýlyq saqtaý mınıstrligi sanıtarııalyq talaptardy buzǵan 470 demalys nysanynyń jumysyna shekteý qoıylǵanyn málimdegen edi.
