Týrıstik aqparat ortalyqtarynyń qyzmetin uıymdastyrýdyń biryńǵaı qaǵıdalary bekitildi
ASTANA. KAZINFORM – Qujat oblystardyń, respýblıkalyq mańyzy bar qalalardyń jáne Astananyń ákimdigi quratyn týrıstik aqparat ortalyqtarynyń jumys tártibin birizdendiredi.
QR Týrızm jáne sport mınıstrligi baspasóz qyzmetiniń habarlaýynsha, qaǵıda týrısterge kórsetiletin qyzmet sapasyn arttyrý jáne týrıstik aqparattandyrýdyń biryńǵaı júıesin qalyptastyrý maqsatynda ázirlendi.
Qaǵıdalarǵa sáıkes týrıstik aqparat ortalyqtary mynadaı fýnktsııalardy oryndaıdy:
- týrıstik marshrýttar, kórikti jerler, týrızm nysandary, olardy aralaý tártibi, qaýipsizdik sharalary, qoldanystaǵy shekteýler jáne tótenshe jaǵdaılar qyzmetteriniń baılanys derekteri týraly ózekti aqparat berý arqyly týrısterdi aqparattandyrý;
- týrızm salasyndaǵy kásipkerlerge aqparattyq jáne konsýltatsııalyq qoldaý kórsetý;
- óńirlerdiń týrıstik áleýeti, týrıstik resýrstary, marshrýttary, týrızm nysandary men týrıstik qyzmetteri týraly aqparatty jınaqtaý, júıeleý jáne turaqty túrde jańartyp otyrý;
- aqparattyq, anyqtamalyq, ádistemelik, jarnamalyq jáne tanystyrylym materıaldaryn ázirleý;
- óńirlerdiń týrıstik áleýetin ishki jáne halyqaralyq týrıstik naryqta ilgeriletýge qatysý;
- «Kazakh Tourism» ulttyq kompanııasymen birlesip týrıstik áleýetti ilgeriletý jáne vızıt-ortalyqtarmen ózara is-qımyl jasaý.
Qaǵıdalar týrıstik aqparat ortalyqtarynyń qyzmetine qoıylatyn mindetti talaptardy da aıqyndaıdy.
Atap aıtqanda, ortalyqtarda kelýshilerge qyzmet kórsetýge arnalǵan úı-jaı nemese arnaıy jabdyqtalǵan oryn, baılanys quraldary men ınternetke qoljetimdilik, ózekti aqparattyq materıaldar, qyzmetkerler, sondaı-aq týrıstik aqparatty turaqty jańartyp otyrýǵa arnalǵan ishki rásimder bolýy tıis.
Kelýshilerge aqparat memlekettik jáne orys tilderinde usynylady. Uıymdastyrýshylyq múmkindik bolǵan jaǵdaıda aqparat shet tilderinde de beriledi. Týrıstik aqparat ortalyqtarynyń jumys rejımin týrıster aǵynynyń maýsymdylyǵy men týrısterdiń qajettilikterin eskere otyryp, jergilikti atqarýshy organdar bekitedi.
-Qaǵıdalardyń qabyldanýy týrıstik aqparat ortalyqtarynyń qyzmetin biryńǵaı standart boıynsha uıymdastyrýǵa, týrıster úshin aqparattyń qoljetimdiligi men sapasyn arttyrýǵa, sondaı-aq memlekettik organdar men týrızm salasyndaǵy uıymdar arasyndaǵy ózara is-qımyldy kúsheıtýge múmkindik beredi,-delingen habarlamada.
Osyǵan deıin habarlaǵanamyzdaı, elde týrızmge salynǵan ınvestıtsııa 1,2 trln teńgeden asty.
