Týrıstik kópsaıys: El kýboginiń alǵashqy kezeńi ótýde
KÓKShETAÝ. QazAqparat - Týrıstik kópsaıys boıynsha QR kýboginiń alǵashqy kezeńi ótýde, dep habarlaıdy QazAqparat tilshisi.
Aqmola oblysy bilim basqarmasy baspasóz qyzmetiniń málimeti boıynsha Kókshetaý qalasyndaǵy №19 orta mektep pen №5 «Tandaý» kópsalaly mektep gımnazııasynda oblystyq bilim basqarmasy janyndaǵy ólketaný jáne ekologııa, balalar men jasóspirimder týrızmi ortalyǵynyń uıymdastyrýymen ótip jatqan jarysqa soltústik óńirlerden jınalǵan sportshylar jasandy relefte (taý týrızmi) týrıstik kópsaıys boıynsha kúsh synasýda.
Saıys «baılanys», «tehnıkalyq», «komandalyq» jáne «quz» tárizdi tórt kezeńnen turady. Sharany uıymdastyrýdaǵy basty maqsat - týrıstik kópsaıysty damytý men nasıhattaý, tehnıkalyq sheberlikti shyńdap, myqty degen sportshylar men komandalardy anyqtaý jáne oblys pen qala quramasyn jasaqtaý.
«Bıylǵy jyly jarysqa Astana, Petropavl, Pavlodar jáne Ekibastuz qalalarynan kelgen komandalar qatysýda. Aqmola oblysynan 5 komanda baq synaýda. Týrnırde top jarǵan jerles sportshylar respýblıkalyq jarystarǵa qatysý úshin Aqmola oblysy quramasynyń sapyna enedi», deıdi jarystyń bas tóreshisi Evgenıı Efremov.
Jarys 6 qańtarǵa deıin jalǵasady. Sonymen qatar, aǵymdaǵy jyldyń aqpan aıynda Aqmola oblysynda «Shańǵy týrızmi tehnıkasy» týrıstik kópsaıysy boıynsha el kýboginiń kezekti kezeńi ótedi.
