Týrıstik kompanııalardy sotta jeńip shyqqanymyzben shyǵynnyń ornyn toltyrý múmkin emes - S. Romanovskaıa
ASTANA. QazAqparat - Elimizdegi týrıstik qyzmet naryǵyn retteıtin sharalardy qabyldaý qajet. Búgin Májiliste Úkimet basshysynyń atyna saýal joldaǵan depýtat Svetlana Romanovskaıa osy máseleni kóterdi.
Saýalynda depýtat Qazaqstannyń týrıstik naryǵynda aǵymdaǵy jyly qalyptasqan jaǵdaıǵa toqtala kele, jazǵy demalystar maýsymy bıyl sheteldik týrlardy uıymdastyrýmen aınalysatyn kompanııalar tóńiregindegi jaǵymsyz jaǵdaılarmen erekshe este qalǵanyn aıtyp, ásirese, otandyq iri týroperator «GúlnárTýr» qyzmetinen 12 myń otbasy japa shekkenin de tilge tıek etti. Onyń aıtýynsha, qazaqstandyq bir ǵana kompanııa emes, birneshe týroperatorlar qyzmetinde problemalar bar.
«Osy turǵydan alsaq, elimizdiń týrıstik naryǵynyń jumysyndaǵy aqaýlar júıeli sıpat alyp keledi deýge negiz bar. Eń bastysy, osy naryqtaǵy qyzmetti tutynýshylar qorǵansyz. Sondyqtan da, Tutynýshylardyń ulttyq lıgasy japa shekken adamdardyń múddesi úshin shaǵym aryzdar túsirgen bolatyn. Alaıda, týrıstik kompanııalar eshqandaı jaýapkershilik almaı otyr, óıtkeni ondaı týrıstik kompanııalardy qalyptastyrýynyń ózinde eshqandaı erekshe sharttar da joq, tipti qarapaıym jarǵylyq qorynyń ózi qamtylmaǵan», - deıdi Svetlana Romanovskaıa.
Bul rette depýtat týrıstik kompanııalardyń quryltaıshylary kóbinese shet elderde turatynyn, sondyqtan da problema týyndaǵan tusta olardy tabý esh múmkin emestigin alǵa tartady. «Sotta jeńip shyqqanymyzben de, bizge shyǵynnyń ornyn toltyrý esh múmkin emes», - deıdi depýtat.
Budan bólek, depýtat memlekettik organdar tarapynan týrıstik qyzmet naryǵy esh qadaǵalanbaıtynyn, bul saladaǵy normatıvtik-quqyqtyq baza da túsiniksiz ekenin alǵa tartady.
