Týrısterge tanymal shıpajaılarda qyzylsha men bezgek aýrýlarynyń tarap jatqany eskertildi
ASTANA. QazAqparat - Dúnıejúzilik densaýlyq saqtaý uıymy men SDC derekteri boıynsha Rýmynııa, Grekııa, Indonezııa, Anglııa, Italııa, Ýkraına, Kongo, Serbııa, Fılıppın elderinde qyzylsha aýrýynyń tarap jatqandyǵy tirkelgen, dep habarlaıdy QazAqparat tilshisi cdc.gov silteme jasap.
Atalmysh elderge saıahattaıtyn týrısterge qyzylshaǵa qarsy ekpe ektirý usynylady.
Sonymen qatar, Nıgerııalyq aýrýlardy baqylaý ortalyǵy elde sary bezgektiń taralýynyń jalǵasyp jatqandyǵyn habarlady. Sondyqtan Nıgerııaǵa baratyn týrıster sary bezgekke qarsy ekpe ektirýi qajet. Sondaı-aq Nıgerııada Lassa bezgeginiń taralýy týraly aqparat ta bar. Atalmysh aýrýdyń belgileri bar týrıster tez arada medıtsınalyq kómekke júginýi qajet.
Brazılııalyq densaýlyq saqtaý salasynyń qyzmetkerleri Venseslaý-Gımaraıns qalasynda bezgek aýrýynyń taralyp jatqandyǵy týrasynda málimdedi. Onda derttti masalar juqtyrýy múmkin. Sondyqtan týrısterge bezgekke qarsy dári-dármekter ishý kerektigi usynylady. Bezgek masanyń shaǵýy arqyly juǵady. Sondyqtan mynadaı, atap aıtqanda, jándikterden qorǵaıtyn quraldardy paıdalaný, jeldetkishi bar bólmede uıyqtaý, dalaǵa shyqqanda qorǵanyshy bar kıim kııý syndy keńesterdi umytpaǵan jón.
Sondaı-aq, Brazılııada atap aıtqanda, Rıo-de-Janeıro, Mınas-Jeraıs jáne San-Paýlý shtattary men San-Paýlý qalasynda sary bezgek aýrýy iri kólemde tarap jatyr. Sondyqtan atalmysh elge baratyn týrıster 10 kún buryn sary bezgekke qarsy ekpe ektirýi qajet. Ekpe ektirmegen týrısterdiń joǵaryda atalǵan aımaqtarǵa barmaǵany jón.
Foto: another-road.ru
