Týrısterge Kólsaı men Sharyndy nasıhattaý azdyq etedi - Rashıda Shaıkenova
TALDYQORǴAN. QazAqparat - Qazaqstan týrıstik qaýymdastyǵynyń dırektory Rashıda Shaıkenova týrısterge Kólsaı men Sharyndy nasıhattaý azdyq etetinin jetkizdi, dep habarlaıdy QazAqparat tilshisi.
«Týrıstik marshrýttardy mazmun jaǵynan baıytý kerek. Mazmundy túrki tarıhy, kóshpendiler órkenıetiniń tarıhymen toltyrýǵa bolady. Elimizge osy qyzmet túrin kórýge keletin eýropalyq týrısterdi Kólsaı men Sharynǵa aparý azdyq etedi. Olar mádenıetimizben, taǵamdarymyzben, qazaq memlekettiligi, kópshpendiler tarıhymen tanysqysy keledi. Týrıster úshin bul jańalyq jáne óte qyzyq dúnıe», - dedi Almaty qalasy Óńirlik keńesiniń múshesi, Qazaqstan týrıstik qaýymdastyǵynyń dırektory Rashıda Shaıkenova.
Rashıda Shaıkenovanyń sózinshe, Almaty jáne Almaty oblysynyń týrıstik naryǵy qaıta jańarýdan ótýi tıis. Sondaı-aq ol oblysta týrıster úshin qonaq úıler ashý boıynsha keshendi sharalar júrgizilip jatqanyn aıtyp ótti. Qazirgi tańda olardyń sany 60-tan asqan.
«Jaqynda biz Qarabulaq aýylynda semınar ótkizdik, onda jańadan 10 qonaq úı ashyldy. Bul, álbette, óńirdiń damýyna oń áser beredi, ornalastyrý boıynsha qyzmet kórsetetin aýyldy básekege qabiletti etedi. Osyndaı úılerdi basqa da aýdandarda ashýdy jalǵastyryp jatyrmyz. Ulttyq parkter de qonaq úı ashý múmkindigin qarastyrýda», - dep atap ótti spıker.
Sonymen birge, sarapshy bıznes ókilderin qyzmet kórsetý sapasyn arttyrýǵa shaqyrdy. Óz kezeginde Almaty oblysy týrızm basqarmasynyń basshysy Janar Alchımbaeva kásipkerler úshin jol boıyndaǵy qyzmet kórsetýdi damytýǵa jaǵdaı bar ekenin jetkizdi.
«Jol boıyndaǵy qyzmet kórsetýdi damytý jónindegi jumys komıssııasy bar jáne biz usynystardy qabyldaýǵa daıynbyz. Qazirgi tańda «QazAvtoJol» ulttyq kompanııasynyń jelisi boıynsha «KazWay» atty eki pavılon salyndy. Bul pavılondardy «QazAvtoJol» kásipkerlerge jalǵa berýge daıyn. Kelesi jyly taǵy da 12 pavılon ashý boıynsha kelisimge keldik. Sondyqtan kásipkerlerdi daıyn modýldi obektilerde jumys istep, tabys tabýǵa shaqyramyz. Onda kafe, kádesyılar dúkeni, ájethana qarastyrylǵan», - dedi oblystyq basqarma basshysy.
Aıta ketý kerek, Panfılov aýdanynyń Jarkent qalasynda ótken kóshpeli otyrysta kásipkerlikti, «Qorǵasta» bıznes júrgizý men týrızmdi damytý máseleleri talqylandy. Jıynǵa Almaty oblysy Óńirlik keńesiniń tóraıymy Rımma Salyqova, Almaty qalasy Óńirlik keńesiniń tóraǵasy ıÝrıı Tileýmuratov, Almaty qalasy Kásipkerler palatasynyń dırektory Baǵdat Telebaı, Almaty oblysy Kásipkerler palatasynyń dırektory Narıman Ábilshaıyqov, Almaty oblysy ákiminiń orynbasary Serikjan Beskempirov, sondaı-aq, kásipkerler men memlekettik organ ókilderi qatysty.
