Týrısterdiń qaýipsizdigine qatysty jańa normalar engizilip jatyr - mınıstr

ASTANA. KAZINFORM – Byltyrǵy statıstıka boıynsha tek taýly jerdiń ózinde júzden astam izdestirý operatsııasy júrgizildi. Bul týraly Májilistiń jalpy otyrysynda azamattyq qorǵaý týraly zań jobasyn talqylaý kezinde QR Tótenshe jaǵdaılar mınıstri Shyńǵys Árinov málim etti.

- Ónerkásiptik qaýipsizdik boıynsha aıtar bolsam, óndiristegi avarııalardyń negizgi sebebi - jabdyqtardyń tozýy. Búgingi tańda jabdyqty aýystyrýdy kóbinese qysqa merzimde qaıta qarjylandyrýǵa múddeli emes obekti ıeleri ózderi júzege asyrady. Tehnologııalardy, qural-jabdyqtardy jáne jumys ádisterimen birge, qaıta jabdyqtaý protsesin tıimdi uıymdastyrý úshin mınıstrlikke qaýipti óndiristik obektilerdi jańartý men tehnıkalyq qaıta jabdyqtaýdyń jıyntyq josparyn kelisý ókilettigi beriledi, - dedi Sh. Árinov.

Sonymen qatar «munaıdyń tógilýin joıý boıynsha ýákiletti organnyń teńiz uıymy uǵymy» engizilip otyr. Byltyr mınıstrlik «Teńiz jasaǵyn» qurdy. Onyń fýnktsııalary - Kaspııde teńiz munaı operatsııalaryn júrgizetin ınfraqurylym obektileriniń qaýipsizdigin qamtamasyz etý. Bul sharalar óndiriste apattardyń týyndaýyn azaıtýǵa múmkindik beredi.

- Jyl saıyn elimizge keletin týrısterdiń sany artyp keledi, al olardyń qaýipsizdigin qamtamasyz etý mańyzdy. Byltyrǵy statıstıka boıynsha tek taýly jerdiń ózinde júzden astam izdestirý operatsııasy júrgizildi. Bul rette týrısterdiń turǵan jeri anyq bolmaǵandyqtan, izdeý jumystary qıyndaıdy. Osyǵan baılanysty týrısterdiń qaýipsizdigin qamtamasyz etý jáne olarǵa ýaqtyly kómek kórsetý boıynsha jekelegen normalar engizilýde. Mınıstrliktiń aýmaqtyq organdaryna azamattardyń aldaǵy júrip-turý baǵyttary týraly habardar etý tártibi jáne jetýi qıyn týrıstik oryndar tizbesi aıqyndalady, - dedi mınıstr.

Buǵan deıin qysta taýǵa shyqqanda qandaı qaýipsizdik erejelerin saqtaý kerek ekenin jazǵan edik.