Týrısterdiń kóbi Aqtóbege iskerlik saparmen keledi
AQTÓBE. QazAqparat - Aqtóbege issaparmen kelýshiler qatary artty, dep habarlaıdy QazAqparat tilshisi.
Aqtóbe oblysynyń ákimi Berdibek Saparbaev týrıstik áleýetti arttyrý jumysynyń josparymen tanysty. Ári jol boıyndaǵy qyzmet kórsetý ortalyqtarynyń qurylysy, sapasy talqylandy.
Oblystyq kásipkerlik basqarmasynyń basshysy Anar Darjanovanyń aıtýynsha, alǵashqy jarty jyldyqta qonaq úıler men hostelderde 54 myń meıman tirkelgen. Bul 2017 jyldyń sáıkes kezeńindegi kórsetkishten 16,6% kóp. Degenmen týrızmde iskerlik saparlar basym. Mádenı, tarıhı muramen tanysýǵa kelýshiler qatary az.
«Ókinishke qaraı, bizdiń oblystyń týrıstik áleýeti búginde tolyq mólsherde qoldanylyp jatqan joq. Mártók, Qobda, Yrǵyz, Baıǵanın aýdandarynyń keleshegi bar. Eger de olardyń kórikti jerlerin dáriptesek, kelýshiler az bolmaıdy»,- dedi Berdibek Saparbaev.
Týrızmdi damytýǵa qyzmetter sapasy men qyzmet kórsetý mádenıetiniń tómendigi de kedergi bolyp tur.
«Qyzmet kórsetý mádenıeti áli de jaqsartýdy talap etedi. Bul másele is júzinde nóldik deńgeıde. Qyzmetkerlerdi ádeptilikke úıretý kerek. Bizde toqsannan astam qonaq úı men meımanhana bar. Biraq jazylǵan pikirlerge qarasaq, olardyń bir de bireýinde ne qyzmetter, ne jaqsy nómirler, ne jóndi tamaqtar joq eken», - dedi oblys ákimi.
Jıyn kezinde týrısterdiń oblysqa kelýin arttyrýda jol boıyndaǵy qyzmet kórsetýdi damytýdyń mańyzdylyǵy atap ótildi.
«Tıisti ınfraqurylymnyń bolmaýy - týrızmdi tejeıtin basty problemalardyń biri. Biz joldardy kóbirek salyp jatyrmyz, biraq jol boıynda qyzmet kórsetetin nysandardyń jartysy standarttarǵa saı emes. «Aqtóbe -Atyraý» jolyn qaıta salý bastalǵan kezde jol boıynda qyzmet kórsetý nysandaryn qatar salý tapsyrylǵan bolatyn. Alaıda bul jumys ol jaqta áli kúnge deıin júrgizilip jatqan joq. Al bul kiris kózi, jańa jumys oryndary emes pe»,- dedi óńir basshysy.
Oblys ákiminiń baspasóz qyzmetiniń habarlaýynsha, jıyn kezinde barlyq baǵyttar boıynsha jumystardy jaqsartý tapsyryldy.
