Týrısterdiń eń jıi jiberetin qatelikteri qandaı

ALMATY. QazAqparat – Belsendi demalýshylar qandaı erejelerdi jıi elemeıdi? Taýǵa qalaı durys daıyndalý kerek jáne eń aldymen neni alyp barý kerek? Osy jáne ózge de suraqtarǵa TJM Respýblıkalyq jedel-qutqarý jasaǵynyń qutqarýshylary jaýap berdi, dep habarlaıdy QazAqparat.

Respýblıkalyq jedel-qutqarý jasaǵynyń bas qutqarýshysy Vadım Paktiń aıtýynsha, jaıaý serýendeý kezinde qaýipsizdikti qamtamasyz etý úshin, eń aldymen jurý baǵytyn josparlap, ol týraly tanystaryńyz ben jaqyndaryńyzǵa aıtyp, habardar etý kerek.

«Taýǵa shyǵýdy josparlamas buryn, júrý baǵytyn anyqtap, toptyń sanyn esepteý kerek, aldaǵy sapardyń barlyq erekshelikterin tolyq bilý kerek: shyǵatyn ýaqyt, qaıtatyn ýaqyt, marshrýttyń kúrdeliligi jáne t.b. Bul jerde jıi kezdesetin qatelik – jaqyndar men tanystarǵa eskertpesten, úndemeı ketý. Apat bolǵan jaǵdaıda zardap shegýshini tezirek tabý úshin marshrýtty, turaqtaǵan oryndardy anyqtaýǵa kóp ýaqyt ketedi», - dedi ol óńirlik kommýnıkatsııalar qyzmetinde ótken brıfınginde.

Odan keıingi eń mańyzdy jaıt – qajetti jabdyqty daıyndaý. Qutqarýshylardyń usynysy boıynsha, ár týrıstiń rıýkzagynda tótenshe jaǵdaılarǵa arnalǵan alǵashqy kómek qobdıshasy, qosalqy batareıalary bar shamdar men basqa da jaryqtandyrǵyshtar, qýattaǵysh quraldar, sý jáne jeńil taǵamdar bolýy kerek. Taýlardaǵy qubylmaly kún raıyn eskere otyryp, aýystyrýǵa bolatyn jyly kıim de artyq bolmaıdy.

«Taýda aýa temperatýrasy qalaǵa qaraǵanda áldeqaıda tómen. Taýǵa shyǵatyndardyń jiberetin qateligi – olar ózderimen birge jyly, aýystyrýǵa bolatyn kıimderdi almaıtyndyǵynda. Óıtkeni, taýǵa shyqqanda adam qatty terleıdi, sodan keıin ol jel tıip, sýyq tııýi múmkin», - dep atap ótti spıker.

Eger týrıst tótenshe jaǵdaıǵa tap bolsa, qutqarýshylardy shaqyrý úshin 112 nómirine qońyraý shalý kerek. Baılanys bolmaǵan jaǵdaıda, týrıster osy maqsattar úshin salynǵan lashyqtardy panalap, qutqarýshylarly kúte alady. Qutqarý lashyqtary taýly marshrýttardyń jıi baratyn ýchaskelerinde ornatylǵan.

«Eger taýda baılanys bolmasa, qazir Almaty qalasynyń TJD-men birlesip, týrıst nemese týrıster toby sýyqtan, qolaısyz kún raıynan biraz ýaqyt panalaı alatyn qutqarý lashyqtary salynǵan. Demek, kómek kúte alady nemese qarańǵy ýaqytta sol jerge túneı alady. Ári qaraı, eger kún shyqsa, marshrýt boıynsha úıge qaraı júrgen durys. Eger adasyp qalsa, onda sol orynda qalý kerek. Eger baılanys bolsa, qutqarýshylardy qaıtadan shaqyrý kerek nemese ádette jaqyn mańdaǵy túnegen lashyqtarda aqparattyq tirekterdegi telefon nómirlerin paıdalaný kerek», - dep atap ótti V. Pak.