Týrıster jalǵyz saıahattaýdy unatatyn elderdiń reıtıngisi jasaldy
ASTANA. QazAqparat - Týrıster daýys berý arqyly álemde saıahatshylardyń jalǵyz júrip aralaýdy unatatyn elin tańdady, dep habarlaıdy moya-planeta.ru saıty.
Daýys berýge dúnıejúzinen 16 myń adam qatysty. Qorytyndy jasaǵan US News & World Report saıty jalǵyzbasty týrısterdiń súıikti eli Ispanııa ekendigin jarııa etti.
Dúnıejúzilik týrıstik uıymnyń sońǵy derekterine sáıkes, Ispanııa 2014 jyly álemdegi eń ataqty týrıstik baǵyttardyń arasynda úshinshi oryndy ıelengen. Sol jyly onda 65 mln týrıst barǵan. Týrıstik saladaǵy kirisi boıynsha Ispanııa Eýropada 1 orynda.
Ispanııa baı tarıhy, mádenıeti jáne til úıirer erekshe ashanasymen týrısterdi ózine tartady. Sonymen qatar, bul el - álemdegi eń qaýipsiz memleketterdiń biri. EYDU derekterine sáıkes Ispanııada kisi ólimi qylmysy 100 myń adamǵa shaqqanda 0,6 ǵana.
Joǵaryda atalǵan elder reıtıngisinde, ekinshi - Italııa, úshinshi - Avstralııa tur. Tórtinshi orynda - Jańa Zelandııa, al birinshi bestikti Brazılııa aıaqtaıdy.
Qazaqstan bul tizimde 58 orynǵa turaqtady.
