Týrıster úshin teatr men kınoǵa barý eń qymbatqa túsetin qala anyqtaldy
ASTANA. QazAqparat - Mádenı demalý úshin Eýropadaǵy eń qymbat qala retinde London anyqtaldy.
Ulybrıtanııanyń koroldik poshtasynyń Travel Money qyzmeti júrgizgen zertteýlerge qaraǵanda, Londondaǵy koroldik baletke barýǵa eki bılet alsańyz, ol úshin qaltańyzda £91 ($150) bolýy shart, al Býdapeshte oǵan nebári £15 ($25) jumsaısyz. Sondaı-aq aǵylshyndar astanasynda sýret galereıalaryna, murajaılar men operalarǵa, klassıkalyq mýzyka kontsertterine bir ret barýdyń ózi úshin £250 ($420 astam) kóleminde qarajatyńyz bolýy kerek. «Kóptegen elderdiń astanalarynda álemdik deńgeıdegi mádenı demalys oryndary bar, al mundaǵy baǵa aıyrmashylyǵy tym joǵary. Sondyqtan ónersúıer qaýym arzanyraq jerlerdi tańdaý arqyly júzdegen fýnttaryn únemdeı alady», - deıdi Travel Money basshysy Endrıý Braýn. Aıta keteıik, 2013 jyly Temza qalasynda 16,8 mln. týrıst bolyp, mádenı oryndarǵa £11 mln. ($18,5 mln.) astam qarajat jumsaǵan. Al Varshavada mádenı mekemelerge bas suqsańyz nebári £70 ($116) kóleminde qarajat jumsaısyz, ol bul turǵydaǵy eń arzan qala sanalyp otyr. Eýropadaǵy murajaıy men kontserttik zaldary qaltańyzdy kóp qaqpaıtyn qalalardyń qatarynda Býdapesht pen Praga da bar (sáıkesinshe £80 ($133) jáne £93 ($154), dep habarlaıdy ITAR-TASS.
