Týrıster úshin Almatyda demalý quny qansha turady
ALMATY. QazAqparat- Almaty týrıstik aqparat ortalyǵy megapolıste demalý quny qansha bolatynyn, EKSPO kezinde jolaýshylar tasymaly qanshalyqty óskenin jarııa etti, dep habarlaıdy QazAqparat tilshisi.
Álemdegi eń iri «TripAdvisor» týrıstik saıtynyń málimetterine súıensek, Almaty eko-týrızm taraýy boıynsha týrısterdiń qyzyǵýshylyǵyn týdyryp otyr. Týrıstik aqparat ortalyǵy mamandary megapolıs týrızminiń odan basqa da tarmaqtary boıynsha suranysty arttyrýǵa bolatynyna senimdi.
«Álbette, Qazaqstanda buqaralyq týrızm damyǵan dep aıta almaımyz. Biz Túrkııamen, onyń mıllıondaǵan týrıster legimen básekelese almaımyz. Týrıster qatary artqan saıyn baǵa da arzandaıdy. Sondyqtan, aıtýly týrıstik baǵyttar boıynsha bizdiń elde demalys, tipti jergilikti turǵyndar úshin de arzan bolmaı otyr. Bizdi Ortalyq Azııa elderimen jıi salystyryp jatady. Biraq bizde ómir súrý deńgeıi joǵary ekeni anyq. Sondyqtan, Qyrǵyzstan men Ózbekstanǵa qaraǵanda bizde baǵa joǵary», - dedi Týrıstik aqparat ortalyǵynyń dırektory Ásel Núrkebaeva.
Onyń aıtýynsha, Almaty qalasynda eń tómengi baǵalarmen eseptegende 7 kúndik demalys 250-300 dollar turady. Onyń ishinde, jatyn oryn, tamaqtaný, qala ishinde qydyrý bar.
«Árıne, eger saıahatshy hostel emes, qonaq úıge túsetin bolsa, onda baǵa joǵary bolady. Bul baǵaǵa kelýshiniń jol qunyn qosyp otyrǵanymyz joq. Ushý baǵasyn qosqanda AQSh nemese Kanadadan keletin qonaqqa Almatyda 7 kún demalyp ketý eń az degende 2000 dollar bolady. Ol shyǵynnyń 90 paıyzy ushaqqa ketedi. Al poıyzben nemese kólikpen kele alatyn Reseı men Ortalyq Azııa týrısterine baǵa arzanyraq bolady», - dedi Ásel Núrkebaeva.
Astanada EKSPO-nyń, Almatyda qysqy ýnıversıadanyń ótýi týrıster leginiń artýyna yqpal etti.
Almaty áýejaıynyń málimetterine súıensek, bıylǵy 7 aı ishinde byltyrǵy sáıkes kezeńmen salystyrǵanda kóshpeli týrızm kórsetkishi 22 paıyzǵa artqan. Almaty qalasy Statıstıka departamentiniń málimetterinde qalada týrısterdi ornalastyratyn oryndar sany 25 paıyzǵa, onda kórsetiletin qyzmet kórsetkishi 18 paıyzǵa artqany jazylǵan.
Aıta keteıik, 8-13 qazan kúnderi Gonkong, Reseı, Sıngapýr, Malaızııa, Qyrǵyzstan, Ózbekstan syndy elderdiń 20 týrıstik kompanııasynyń ókilderine Almatyny tanystyrý úshin aqparat-tanysý saıahatyn uıymdastyrǵan. 
