Týrıster úshin 5 tilde «sóıleıtin» qosymsha ázirlendi
ÓSKEMEN. QazAqparat - Shyǵys Qazaqstan oblysynda tsıfrlandyrý baǵdarlamasynyń arqasynda kıeli jerlerdi zertteý burynǵydan da jeńildeı tústi, dep habarlaıdy QazAqparat altaynews.kz saıtyna silteme jasap.
Endigide el turǵyndary Qazaqstannyń tarıhı-mádenı álemi týraly bes tilde maǵlumat ala alady. Bul «Tsıfrlyq Qazaqstan» baǵdarlamasy aıasynda ázirlengen «Tarıhı jol» qosymshasynyń arqasynda múmkin bolyp otyr.
Jobany ShQO ákimdiginiń qoldaýymen jeke kompanııa iske asyrýda. «Tarıhı jol» qosymshasynda aqparattyń qabyldanýyn jaqsartý maqsatynda tarıhı keıipkerler úlgisindegi shynaıylyq kórinister engizilgen. Sondaı-aq vırtýaldy shynaıylyq pen óńirdiń kıeli jerlerinde júrgendeı sezim týdyrý úshin 360 gradýstyq vıdeorolıkter ornalastyrylǵan. Týrıster qosymshany ınterneti joq aýmaqtarda oflaın-redimde de paıdalana alady.
Qosymshany týrıstik gıd retinde de qoldanýǵa bolady. Ol barlyq týrıstik nysandar, qonaqúıler, meıramhanalar týraly «biledi». Aqparattardyń barlyǵy qazaq, orys, aǵylshyn, túrik jáne qytaı tilinde berilgen.
Qosymshany ázirlegen kompanııanyń ókili Aıbek Álmuhametovtiń aıtýynsha, bul joba óńirdiń ishki jáne syrtqy týrızm salasyn damytýǵa septigin tıgizedi. «Sondaı-aq árbir nysannyń týrıstik áleýetine taldaý jasaýǵa bolady. Bul týrıster sany men servıs sapasyn arttyrýǵa yqpal etpek», - deıdi ol.
Aıta keteıik, atalmysh júıede búgingi tańda Shyǵys Qazaqstanda ornalasqan 40-tan astam nysan tsıfrlandyrylǵan.
