Týrıster shaǵymynan keıin Jetisýda Úshbulaq mańyndaǵy shoshqa sharýashylyǵy jabyldy

ASTANA. KAZINFORM — Jetisý oblysynda áleýmettik jelidegi shaǵym negizinde zańsyz sharýashylyq toqtatyldy, dep habarlaıdy Ekologııa jáne tabıǵı resýrstar mınıstrligi.

Vedomstvo málimetine sáıkes, áleýmettik jelilerde júrgizilgen monıtorıng nátıjeleri boıynsha Jetisý oblysy Alakól aýdany Úshbulaq aýyldyq okrýginiń aýmaǵynda shoshqa ósirýmen aınalysatyn «Qaratas» ShQ mańynan jaǵymsyz ıis shyǵatyny jóninde materıaldar jaryq kórdi.

Beınerolık bıylǵy jyldyń 21 sáýirinde jarııalanyp, dereý ýákiletti memlekettik organdarmen tıisti jumys júrgizildi. Atap aıtqanda, Jetisý oblysy boıynsha ekologııa departamenti sharalar qabyldaý úshin Alakól aýdanynyń polıtsııa bólimine hat joldady, tıisinshe tabıǵat qorǵaý polıtsııasynyń qatysýymen tekserýler júrgizildi. Aǵymdaǵy jyldyń 22 sáýirinde sharýa qojalyǵynyń ıesi týrıster úshin ákelingen jabaıy shoshqalardy (ósirý maqsatynda emes) áketken. Anyqtalǵan buzýshylyq tolyǵymen joıyldy.

Sondaı-aq, Jetisý oblysynyń Jer resýrstaryn basqarý departamenti jospardan tys tekserý júrgizdi, onyń nátıjeleri boıynsha jer ýchaskesiniń nysanaly maqsatymen kózdelmegen kúrdeli obektilerdiń qurylysy anyqtaldy.

— Sharýashylyq basshysyna qatysty ákimshilik sharalar qabyldanyp, atalmysh buzýshylyqtardy joıý týraly nusqama berildi. 2025 jyldyń shilde aıynda oqıǵa ornyn qosymsha vızýaldy tekserý barysynda shoshqa ósirý jumystary toqtatylǵany belgili boldy, tabıǵı landshaft qalpyna keltirilip, Qarabulaq ózeniniń saǵasynda jaıaý týrısterdiń súıikti serýendeý orny qaıtaryldy, — delingen resmı habarlamada.

Buǵan deıin Reseı Federatsııasynan elge shoshqa etin zańsyz ákelý áreketi toqtatylǵanyn jazdyq.