Týrıster Rımdegi Trevı sýburqaǵyna jaqyndaý úshin eki eýro tóleýge májbúr bolady
ASTANA. KAZINFORM — Rımde týrıster áıgili Trevı sýburqaǵyn jaqynnan kórý úshin €2 kóleminde kirý aqysyn tóleýge mindettelmek. Bul týraly VVS habarlaıdy.
Qala bıligi osylaısha, sonyń ishinde, «retsiz týrıstik aǵyndardy» azaıtýdy kózdep otyr.
Barokko stılindegi sáýlet eskertkishin tamashalaǵysy keletin kelýshilerge arnalǵan jańa shekteý 2026 jyldyń 1 aqpanynan bastap kúshine enedi.
Jınalǵan qarajat qalalyq bıýdjetke túsip, sýburqaqty kútip-ustaý men kelýshilerge qyzmet kórsetý shyǵyndaryn óteýge jumsalady. Qala bıligi tek osy nysanǵa kirý aqysynan jylyna 6,5 mln eýro tabys tabýdy josparlap otyr.
Bul sheshimdi juma kúni jarııalaǵan Rım meri Roberto Gýalterı Reuters agenttiginiń habarlaýynsha: «Eki eýro — bul onsha kóp aqsha emes… jáne bul týrıstik aǵynnyń retsizdigin azaıtady» degen.
Trevı sýburqaǵyna kirý aqysy Italııa astanasyndaǵy keıbir mýzeıler men eskertkishterge arnalǵan jańa tarıftik júıeniń bir bóligi.
Qazirgi ýaqytta kirý aqysy alynatyn birqatar nysanǵa Rım turǵyndary úshin kirý tegin bolady.
Al týrıster men Italııanyń rezıdenti bolyp tabylmaıtyn tulǵalar Trevı sýburqaǵyn jáne taǵy bes kórikti jerdi, sonyń ishinde Napoleon mýzeıin tamashalaý úshin aqy tóleýi tıis.
Bes jasqa deıingi balalar, sondaı-aq múgedektigi bar adamdar men olardy ertip júretin bir adam atalǵan kórikti jerlerdi qaraý úshin tólemnen bosatylady.
Týrıster 18 ǵasyrda ıtalııalyq sáýletshi Nıkola Salvı salǵan Trevı sýburqaǵyn burynǵydaı tegin kóre alady, biraq alystan tamashalaýǵa ǵana múmkindik beriledi.
Rım merııasynyń málimetinshe, qazirgi tańda bul nysanǵa kúnine orta eseppen 30 000 adam keledi.
Ótken jyly júrgizilgen qalpyna keltirý jumystarynan keıin Gýalterı kórikti jer mańynda úlken toptardyń jınalýyn boldyrmaý úshin kezek júıesin engizgen.
Qazirgi ýaqytta sýburqaq mańynda bir mezette 400 adamnan artyq bolýyna ruqsat etilmeıdi.
Buǵan deıin biz sheteldik týrıster arasynda Almatydaǵy eń tanymal oryndardy ataǵan edik.