Týrıster men týragenttikter arasyndaǵy 40-tan astam daý sotta qaralyp jatyr
ASTANA. KAZINFORM — Týrızm jáne sport mınıstrligi Kazinform saýalyna joldaǵan jaýabynda týrısterden qandaı másele boıynsha jıi shaǵym túsetinin aıtty.
«Negizinen ýákiletti organǵa týrısterden týrkompanııalardyń shart talaptaryn oryndamaýyna, sondaı-aq jalǵan kompanııalardyń nemese jeke tulǵalardyń alaıaqtyq áreketine qatysty shaǵymdar túsedi. Óz kezeginde alaıaqtyq jaǵdaılary anyqtalǵan kezde mınıstrliktiń týrızm ındýstrııasy komıteti óz quzyreti boıynsha quqyq qorǵaý organdaryna tıisti hat jiberedi. Týrızm ındýstrııasy komıtetiniń saıtynda azamattar týrıstik kompanııalarǵa júgingen kezde týragenttik qyzmet týraly habarlamanyń bar-joǵyn jáne týroperator lıtsenzııasynyń bar-joǵyn teksere otyryp, barlyq qajetti qujattardy suratý qajettigi týraly eskertilgen. Sonymen qatar, komıtet pen jergilikti atqarýshy organdardyń ınternet-resýrstarynda týroperatorlardyń, týragentterdiń ózekti tizilimi jarııalanǵan», — deıdi mınıstrlik.
Osyndaı shaǵymdardyń negizinde týrıstik operatorlardyń 9 lıtsenzııasy ýaqytsha toqtatylǵan.
«Týrızm jáne sport mınıstrligi týrızm ındýstrııasy komıtetiniń bastamasymen „Týrıstik Qamqor“ korporatıvtik qorymen, Astana jáne Almaty qalalarynyń týrızm salasyndaǵy basqarmalarymen birlesip, Qazaqstan zańnamasyn buzǵan týrıstik operatorlardyń 9 lıtsenzııasyn toqtata turý jóninde sheshim qabyldandy. Qazirgi tańda týrızm ındýstrııasy komıteti úshinshi tarap retinde azamattardyń týrkompanııalarǵa talap qoıýy boıynsha 40-ten astam sotqa qatysyp jatyr, onyń 35-ke jýyǵy oń sheshimmen aıaqtaldy», — delingen mınıstrlik jaýabynda.
