Týrıster Marsqa 5 jyldan keıin jetedi
ASTANA. 21 aqpan. QazAqparat - Marsqa alǵashqy basqarylatyn ekspedıtsııa 2018 jylǵy qańtarda attanady, dep habarlady Ýtro.rý.
Ǵaryshtyq týrdyń uzaqtyǵy 501 kún bolady dep jarııalady alǵashqy ǵarysh týrısi jáne kásipker Dennıs Tıto Spaceref.com saıtyndaǵy habarlamasynda.
Ushýdyń bastalýy Jer men Marstyń ornalasý ýaqyty mıssııanyń qolaıly kezine josparlanyp otyr. Ǵaryshtyq týrdy uıymdastyrýmen Inspiration Mars Foundation kommertsııalyq emes kompanııasy aınalyspaq. Saıahatqa kim demeýshilik jasaıdy, týrıster qandaı tehnıkamen attanady, ushýǵa kim qatysady, munyń bári 27 aqpanda Vashıngtonda ótetin baspasóz máslıhatynda belgili bolmaq.
Sońǵy birneshe jyl boıy týrısterdi qaıda jiberý máselesi san-saqqa júgirtilip, bas aýrýyna aınaldy. Ártúrli bıiktiktegi orbıtalyq ushýǵa da, Aıǵa da, tipti úrilgen ǵaryshtyq qonaqúıge de jibermekshi boldy. Nevadada kommertsııalyq ǵarysh aılaǵy da salyndy, biraq ta jeke kemelermen ázirge eshkim de ushqan joq. Týrıster paıdalana alatyn bir ǵana múmkindik - Halyqaralyq ǵarysh stansasyna barý, biraq ol óte qymbat, sondyqtan da eshkimniń kóńili daýalamaı otyr.
Eske sala keteıik, 2012 jylǵy jeltoqsanda Aıǵa bir adamǵa 1,5 mıllıard dollarǵa ushý usynyldy. Golden Spike jeke kompanııasy bul saparǵa osyndaı qarjy surady. NASA-nyń burynǵy qyzmetkerleri Aıǵa birden eki týrısti jiberýge ázir ekenin jarııalady. Aı ekspedıtsııasy osy onjyldyqtyń sońyna josparlanyp otyr.
