Týrıster kórýi tıis Qazaqstandaǵy 10 jer ataldy
NUR-SULTAN. QazAqparat - «Kazakh Tourism» ulttyq kompanııasy» AQ basqarma tóraǵasy Órken Bısaqaev tabysy ortasha qazaqstandyqtar otandyq demalys oryndarynda qansha qarajat jumsaıtyndyǵyn aıtty, dep habarlaıdy QazAqparat.
«Elimizdiń árbir óńiri tabıǵı jáne tarıhı-mádenı muraǵa asa baı, olardyń kóbi qazirgi tańda da asa tanymal bolyp otyrǵan joq. Onyń negizgi sebepteriniń qatarynda tıisti usynystar men ınfraqurylymnyń, aqparattyń bolmaýy da bar. Elimizdiń batys óńirleriniń turǵyndary elimizdiń shyǵysynda nemese ońtústiginde ne baryn bilmeıdi jáne kerisinshe. Tipti týrıstik kompanııalardyń ókilderiniń ózi elimizdegi kóptegen qalalar men týrıstik oryndarda bolmaǵandaryn moıyndaıdy. Sondyqtan ótken aıda biz otandyq týrkompanııalar úshin Qazaqstan boıynsha aqparattyq týrlarǵa bastama berdik. Birinshi týrǵa Batys Qazaqstannyń 4 óńirinen 12 týragenttik pen operator qatysyp, Nur-Sultan, Býrabaı, Shymkent, Saryaǵash, Almaty, Almaty jáne Shyǵys Qazaqstan oblystaryn aralandy. Onyń qorytyndysy boıynsha aqparattyq týrǵa qatysqan keıbir kompanııalar qazir Saryaǵash, Býrabaı jáne Shyǵys Qazaqstan sanatorıılerine jazǵy maýsymǵa týrlar satýdy bastady. Bul tájirıbe basqa óńirlerdegi týrfırmalardyń ókilderiniń qatysýymen jalǵasyn tabady», - dedi rrimeminister.kz saıtynda suhbat bergen Ó.Bısaqaev.
Onyńatap ótýinshe, ótken jyly Úkimet Qazaqstan Respýblıkasynyń Týrıstıfıkatsııa kartasyn ázirledi. Onda respýblıkalyq mańyzy bar TOP-10 nysan jáne óńirlik mańyzy bar TOP-50 nysan aıqyndaldy. TOP-10 nysan qataryna Nur-Sultan qalasy, Imantaý-Shalqar, Şýche-Býrabaı kýrorttyq aımaqtary, Baıanaýyl, Alakól kóliniń jaǵalaýy (ShQO, Almaty), Balqash, Almaty óńiriniń taý klasteri, Mańǵystaý men Túrkistan endi. Bul aımaqtardyń týrızmdi damytý turǵysynan áleýeti zor.
«Memlekettik baǵdarlamada atalǵan aımaqtarda qajetti ınfraqurylymdy damytý qarastyrylatyn bolady. Bul óz kezeginde týrısterdiń onda bolýy úshin qolaıly jaǵdaılar jasaıdy. Bul rette, TOP-10 nemese TOP-50 nysandardyń árqaısysy 100 paıyz zerttelmegen. Tipti, týrıster aǵymy qalyptasqan Baıanaýyl, Balqash, Túrkistanda tek birli-jarym adamdar ǵana biletin jerler men nysandar bar. Sondyqtan, memlekettik baǵdarlama aıasynda bul nysandardy el ishinde de, shetelderde de ilgerletý boıynsha jumystar júrgizý josparlanǵan. Bizdiń elimiz týrısterge san alýan demalys túrlerin usyna alady. Demalys oryndaryn týrızm túrine qaraı tańdaýǵa bolady. Biraq myna 10 jerdi árbir adam kórýi tıis: Qaıyńdy, Býrabaı, Bozjyra, Rahman bulaǵy, Qorǵaljyn kóli, Aqtaý taýy, áıgili ánshi qumdar, Belýha, Sharyn shatqaly, Kólsaı jáne Inder kólderi», - dedi ol.
