Týrıster kóp baratyn ShQO marshrýttarynda sanıtarlyq ınfraqurylym álsiz

ÓSKEMEN. KAZINFORM — Shyǵys Qazaqstan oblysyna keletin týrısterge jol boıyndaǵy qarapaıym jaǵdaılardyń jasalmaýy salanyń damýyna qolbaılaý bolyp tur.

Sanıtarlyq toraptar tapshylyǵy men jol boıyndaǵy nashar ınfraqurylymǵa týrısterdiń kópshiligi shaǵymdanady. Jer aýmaǵy keń óńir úshin bul másele erekshe seziletini anyq. Altaıǵa, Katonqaraǵaıǵa, Rahman qaınaryna, Buqtyrmanyń Samar jaǵalaýyna aparatyn jol uzaq. 

— Jazda biz Buqtyrmanyń Samar jaǵalaýyna jıi baramyz. Biraq júz shaqyrym jolda bir ǵana dárethana bar. Onyń ózi kóbine bes batpan kir. Kirgiń de kelmeı ketedi. Keıde butaǵa bara salǵan ońaıyraq sııaqty, — deıdi týrıster.

Shyǵys Qazaqstan oblysynyń týrızm basqarmasynan sanıtarlyq toraptar jetispeýshiligi máselesi belgili ekenin jáne kezeń-kezeńimen sheshilip jatqanyn málim etti. 

— Qazirgi tańda oblysta 34 sanıtarlyq-gıgıenalyq torap jumys istep tur, olardyń sany jyl saıyn artyp keledi. Sonymen qatar mundaı nysandardy kútip-ustaýǵa sýbsıdııa qarastyrylǵan, — dedi basqarma basshysynyń orynbasary Irına Smıt.

Alaıda týrıstik bıznes ókilderiniń aıtýynsha, demalýshylar úshin dárethananyń bar-joǵy ǵana emes, onyń jaı-kúıi men qoljetimdiligi mańyzdy.

— Men týrısterdi, sonyń ishinde sheteldikterdi de Shyǵys Qazaqstannyń eń kórikti jerlerine alyp baramyn. Shyny kerek, keıde jolda kenetten bireý dárethanaǵa barǵysy kelip qalmasa eken dep tileımin. Sebebi keı sanıtarlyq toraptarǵa kirý múmkin emes. Al týrıst keıin «tabıǵaty keremet, biraq tıisti jaǵdaı joq» dep ketedi. Osy bir sózben barlyq áserdi joqqa shyǵarady, — deıdi týroperator Muhtar Toıbazarov.

Onyń aıtýynsha, týrıst qymbat servıstiń joqtyǵyn keshirýi múmkin, biraq uzaq joldaǵy qarapaıym qolaısyzdyqty esh keshire almaıdy.

Máseleniń mańyzyn eskere otyryp, sońǵy bir jylda respýblıkalyq joldarǵa jaýapty «QazAvtoJol» ulttyq kompanııasy da bul baǵyttaǵy jumystardy kúsheıtken.

— Shyǵys Qazaqstan oblysyndaǵy respýblıkalyq mańyzy bar avtomobıl joldarynyń jalpy uzyndyǵy — 1238 shaqyrym. Bul joldar boıynda búginde 39 servıstik nysan jumys isteıdi. Olardyń barlyǵy ulttyq standartqa sáıkestendirilgen. Sonymen qatar negizgi týrıstik baǵyttarda segiz jyly sanıtarlyq-gıgıenalyq torap qyzmet kórsetip jatyr, — dedi ulttyq kompanııanyń ShQO fılıaly dırektorynyń orynbasary Ádilet Jampeıisov.

Onyń aıtýynsha, sońǵy bir jylda jol boıyndaǵy ınfraqurylym aıtarlyqtaı jaqsardy. Qazir tasjoldarda tek dárethanalar ǵana emes, demalys oryndary men kofe ishetin shaǵyn keshender de jumys isteıdi.

— Týrıster aǵyny kóp jerlerde servısti maqsatty túrde damytyp jatyrmyz. Altaı men Katonqaraǵaı baǵytyndaǵy joldarda taǵy birneshe jyly sanıtarlyq torapty iske qosýdy josparlanǵan, — dedi Á.Jampeıisov.

Eske salsaq, osyǵan deıin Astana Eýropanyń qoljetimdi týrızm jelisine resmı túrde qosylǵany habarlanǵan.