Týrıster Qazaqstannyń shekara mańyndaǵy demalys aýmaqtaryna kedergisiz kiredi
ASTANA. QazAqparat - «Shekaralyq beldeýdiń, karantındik beldeýdiń jáne shekaralyq aımaqtyń shekterin belgileý týraly» QR Úkimetiniń qaýlysyna ózgerister engizilgen soń, sheteldik týrıster elimizdiń shekara mańynda ornalasqan demalys aımaqtaryna kedergisiz kire alady.
Bul týraly Investıtsııalar jáne damý mınıstrliginiń baspasóz qyzmeti habarlady.
Máseleniń mán-jaıyn túsiniretin bolsaq, «Shekaralyq beldeýdiń, karantındik beldeýdiń jáne shekaralyq aımaqtyń shekterin belgileý týraly» Qazaqstan Respýblıkasy Úkimetiniń 2014 jylǵy 16 sáýirindegi № 356 qaýlysyna sáıkes, shekara mańynda ornalasqan Qazaqstannyń biraz týrıstik aımaqtary 25 shaqyrym aýmaqqa kirip-shyǵý nemese ýaqytsha mekendeý arnaıy ruqsat qaǵazben iske asatyn QHR-nyń shekaralas ákimshilik aýdandarynyń terrıtorııasyna kirip ketken bolatyn. Bunyń saldarynan Qazaqstannyń kórikti mekenderine kelemiz degen ózge sheteldik týrıster tek Syrtqy ister mınıstrliginiń arnaıy ótkizý qaǵazyn alýǵa májbúr boldy.
«Osyǵan baılanysty Investıtsııalar jáne damý mınıstrligi shekaralyq oblystardyń ákimdikterimen birlese otyryp, sol shekara mańyndaǵy týrıstik nysandarǵa qoıylatyn rejimdik shekteýlerdi alyp tastaý nemese toqtata turý úshin týrısterge tartymdy oryndardyń tizimin jasady. Barlyq pikirler men usynystar qaralǵan soń, «Shekaralyq beldeýdiń, karantındik beldeýdiń jáne shekaralyq aımaqtyń shekterin belgileý týraly» Qazaqstan Respýblıkasy Úkimetiniń 2014 jylǵy 16 sáýirdegi № 356 qaýlysyna ózgerister men tolyqtyrýlar engizý týraly» QR Úkimetiniń qaýly jobasy ázirlendi. Búgingi tańda Úkimet qaýlysyna QR Premer-Mınıstri qol qoıyp, qujat resmı jarııalanýǵa daıyndalyp jatyr».
Qaýlyǵa sáıkes, sheteldik týrıster men azamattyǵy joq adamdardyń kirýi úshin shekaralyq rejım qoldanylmaıtyn shekara mańyndaǵy aýmaqtardyń tizimi bekitildi. Tizimge Úlken Almaty kóli, Sharyn, Jońǵar Alataýy ulttyq tabıǵı parkter, Kólsaı kóli, Shymbulaq shıpajaıy, Medeý, Kók Jaılaý, Ústirt tabıǵı qoryǵy, sondaı-aq Aqtaý, Atyraý, Oral, Rıdder, Saryaǵash, Taraz jáne taǵy birqatar belgili týrıstik oryndar qosylyp otyr.
«Úkimet qaýlysy resmı jarııalanǵannan bastap 10 kúnnen keıin kúshine enedi»,-delingen baspasóz qyzmetiniń aqparatynda.
