Týrıster Býrabaı tabıǵatyn tikushaqpen tamashalaı alady

ASTANA. KAZINFORM — Keler jyldan bastap Býrabaıǵa qydyryp, demalýǵa baratyn týrısterdiń ásem ólkeniń tabıǵatyn tikushaqpen tamashalaý múmkindigi bolady. Bul týraly Aqmola oblysynyń ákimi Marat Ahmetjanov málim etti.

— Bıyl qyrkúıekte úlken kásiporynmen kelisimshart jasaldy. Kelesi týrıstik maýsym bastalǵanda tikushaqpen 15-20 mınýt jáne jarty saǵat kóleminde Býrabaıdy aınalyp, ekskýrsııa jasaýǵa bolady. Bul Býrabaıdyń keremet sulý tabıǵatyn áýeden kórýge múmkindik, — dedi Marat Ahmetjanov agenttik tilshisiniń saýalyna jaýap bere turyp.

Ákimniń aıtýynsha, tikushaqpen ekskýrsııany jeke kompanııa júzege asyrady jáne baǵany ózderi qoıady.

— Baǵany ýaqytyna, ıaǵnı 15 mınýt, 20 mınýt tapsyrysqa qaraı qoıady, — dep tolyqtyrdy óńir basshysy.

Buǵan deıin polıtseıler Býrabaı tabıǵı aımaǵyn dronnyń kómegimen kúzetetini týraly habarlaǵan edik. 

Odan bólek, jazda Býrabaı kólderi beınebaqylaý kameralarynyń kómegimen baqylanatyny aıtyldy.