Týrınde narazylyq bildirýshilermen qaqtyǵysta 100-den asa polıtseı jaraqat aldy

ASTANA. KAZINFORM — Italııa BAQ-tarynyń habarlaýynsha, 97 polıtsııa qyzmetkeri, bes karabıner jáne qarjy gvardııasynyń (Ekonomıka mınıstrliginiń qaýipsizdik kúshteri) jeti qyzmetkeri jaraqat aldy, dep habarlaıdy Kazinform menshikti tilshisi.

Narazylyq bildirýshilerdiń polıtsııa qyzmetkerleriniń birin urýy Italııada erekshe rezonans týdyrdy. Narazylyq bildirýshiler toby ony qorshap alyp, taıaqpen jáne qurylys quraldarymen jappaı urǵan.

Eldiń premer-mınıstri Djýlııa Melonı demalys kúnderi Týrınge baryp, aýrýhanada jatqan polıtsııa qyzmetkeriniń jaǵdaıyn bilip qaıtty.

Djýlııa Melonı bul oqıǵalardy «memleketke shabýyl» dep atady.

— Bireýdi balǵamen urǵanda, onyń saldary óte aýyr bolýy múmkin ekenin aldyn ala bilesiń. Bul – narazylyq emes, bul – qaqtyǵys ta emes. Bul adam óltirýge oqtalý dep atalady, — dedi Italııa premer-mınıstri.

Aıta keteıik, Týrındegi áleýmettik ortalyqty buzý týraly úkimet josparyna qarsy narazylyq qaqtyǵysqa ulasty. Demonstratsııa kezinde úkimetke qarsy urandar men Palestınany qoldaýǵa shaqyrýlar estildi.

Narazylyq bildirýshiler qoqys konteınerlerin órtep, polıtsııa qyzmetkerlerine tas laqtyrdy. Olar sý atqyshtarmen toıtarys berdi.

Buǵan deıin Italııada narazylyq kezinde polıtseı soqqyǵa jyǵylǵanyn habarlaǵan edik.