Túrikter karton qaptamalar zaýytyn salýǵa Qazaqstannan seriktes izdeýde

QYZYLORDA. QazAqparat - Qyzylorda oblysy kásipkerler palatasynda túriktiń «Chýkýrova Holdıng» kompanııasynyń bas dırektory Doanly Isa, josparlaý jáne satý jónindegi dırektor Tokatly Kamıl Mehmed, Kýrý Bora aımaq kásipkerlerimen kezdesti, dep habarlady QazAqparat tilshisi.

Kompanııa túrli saladaǵy taýarlardyń qaptamasyn shyǵarýmen aınalysatyn Túrkııadaǵy jetekshi kásiporyndardyń biri. Búginde atalmysh túriktik kompanııa balǵyn jemister men kókónisterge, qatty jáne suıyq maılarǵa, et, balyq, jumyrtqa, sýsyndar men hımııalyq taýarlardyń qaptamalaryn ázirleýmen aınalysady.

1976 jyldan beri beldi kompanııalardyń ónimderine qamtama jasap júrgen «Chýkýrova Holdıng» kásiporny endi Qazaqstanda gofrokartonnan qaptama jasaıtyn kásiporyn ashpaq. Ol úshin qolaıly aýmaq retinde ońtústik óńirlerdi alyp otyr.

«15-20 adam turaqty jumys isteıtin zaýyt salmaqshymyz. Aldymen jergilikti kásiporyndardyń karton qaptamalaryna degen qajettiligin anyqtaımyz. Ekonomıkalyq turǵyda tıimdi bolatynyna senimdimiz. Óıtkeni, baý-baqsha, jemis-jıdek, sút ónimderi munda kóp ázirlenedi eken. Al qaptamalar shyǵaratyn birde-bir zaýyt joq. Sondaı-aq jergilikti kásipkerler shıkizatqa qamysty paıdalanýǵa bolatyndyǵyn aıtty. Buny mamandarmen aqyldasyp, sheshim qabyldaıtyn bolamyz», - deıdi «Chýkýrova Holdıng» kompanııasynyń bas dırektory Doanly Isa.

Kásipkerler palatasy alańyndaǵy kezdesýde qyzylordalyq kásipkerler jobaǵa qyzyǵýshylyǵyn tanytyp, qajetti daıyn bazany berýge ázir ekendikterin jetkizdi.

Kásipkerler palatasy Óńirlik keńesiniń múshesi Tóreǵalı Shankereı jobany Qyzylorda oblysynda júzege asyrýdyń artyqshylyqtaryna toqtalyp ótti.

«Zaýytty Qyzylordada salýda utatyn jerlerińiz kóp. Birinshiden, Qyzylorda oblysy «Batys Eýropa-Batys Qytaı» avtojolynyń boıynda ornalasqan. Zaýyt ónimderin Qyzylorda men Ońtústik Qazaqstan oblysy ǵana emes, ar jaǵynda Qaraǵandy, Taraz, ber jaǵynda Aqtóbe oblysyna da keńinen tasý, tutynýshylardy tabý múmkindikteri zor», - dedi ol.