TÚRІKSOI-dyń 25 jyldyǵy Bishkekte «Meniń dostarym - meniń baılyǵym» kontsertimen órnekteldi
ASTANA. QazAqparat - Qyrǵyzstan astanasy Bishkekte Túrki mádenıetin jáne ónerin damytý halyqaralyq uıymynyń (TÚRKSOI) 25 jyldyǵyna oraı, «Meniń dostarym - meniń baılyǵym» atty kontsert ótkizildi, dep habarlaıdy «QazAqparat» HAA tilshisi.
TÚRІKSOI uıymdastyrǵan kontsertke túrki tektes memleketterden kelgen 70-ke jýyq ónerpaz qatysty.
K. Moldobasanov atyndaǵy Qyrǵyz memlekettik konservatorııasynda uıymdastyrylǵan kontsertke Qyrǵyzstan Premer-mınıstriniń orynbasary Sholpon Sultanbekov, Qyrǵyz memlekettik konservatorııasynyń rektory Muratbek Begalıev, ártúrli ınstıtýttar men uıymdardyń, shyǵarmashylyq birlestikterdiń ókilderi men shaqyrylǵan meımandar keldi.
Kontsert aldynda sóz sóılegen vıtse-premer Sholpon Sultanbekov Qyrǵyzstan eliniń prezıdenti Sooronbaı Jeenbekovtyń quttyqtaýyn oqyp, túrki áleminiń mádenıeti men óneriniń damýyna zor úles qosyp júrgen TÚRІKSOI-ǵa alǵysyn bildirdi. Sholpon Sultanbekov óz sózinde qyrǵyz óneriniń tanymal bolýyna búkil álemde TÚRІKSOI ólsheýsiz úles qosyp júrgenin, 25 jyldyń ishinde uıym kóptegen kontsertti ótkizip kele jatqanyn tilge tıek etti.
Rektor Muratbek Begalıev óz kezeginde TÚRKSOI-men birlesken seriktestik konservatorııaǵa kóptegen halyqaralyq jobalarǵa atsalysyp, túrik mýzyka óneriniń álemdegi damýyna septigin tıgizgenin atap ótti. Muratbek Begalıev sonymen birge 25 jyldyń ishinde TÚRІKSOI zor jetistikke qol jetkizgenin aıtty.
Bas hatshy Dúısen Qaseıinov jıylǵan kópshilikke arnap quttyqtaý sózin sóılep, túrki áleminiń murasyn álemge nasıhattaýda TÚRІKSOI aldaǵy ýaqytta da kúsh salatynyn habarlady. Naqtyraq aıtqanda, TÚRІKSOI-dyń 25 jyldyǵy túrki elderinde atalyp ótpek.
Bishkektiń Sımfonııalyq orkestiriniń oryndaýynda atalǵan kontsertte klassıkalyq repertýardaǵy týyndylar men túrki álemi kompozıtorlarynyń shyǵarmalary ornydaldy. Kontsert baǵdarlamasynda sonymen qatar, Ýzeır Gadjıbekovtyń «Keroglý» men Muqat Tólebaevtyń «Birjan men Sara» operalary shyrqaldy.
Orkestrge Anvar Akbarov pen Qanat Ahmetov (Qazaqstan), Baqyt Tólegenov pen Rahat Osmanalıev (Qyrǵyzstan), Rovshan Nepesov (Túrkmenstan) dırıjerlik jasap, Ilham Nazarov (Ázerbaıjan), Jupar Gabdýllına (Qazaqstan), Baqtybek Ybykeev, Elnýra Samarbekova, Salamat Sadyqova (Qyrgyzstan), Serkan Kodjadere (Túrkııa), Nosır ıÝsýpov pen Ferýza ıÝsýpova (Ózbekstan), Ramıl Gaızýllın (Bashqurtstan (RF) sekildi oryndaýshylar ánnen shashý shashty.
«Meniń dostarym - baılyǵym» kontserti bishkektikterge umytylmas kesh syılap, Klod Fransýanyń «My way» kompozıtsııasymen aıaqtaldy. Ol týyndyny TÚRKSOI-dyń bas hatshysy Dúısen Qaseıinov skrıpkada jeke oryndady.
