Túrikmenstannyń beıtaraptyq saıasaty beıbit sıpatqa ıe – elshi

NUR-SULTAN. QazAqparat – Qazaqstandaǵy Túrikmenstan Respýblıkasynyń Tótenshe jáne Ókiletti Elshisi Batyr Redjepov eki el arasyndaǵy dostyq qarym-qatynas pen Túrikmenstannyń beıtaraptyq saıasatyna qatysty túsinik berdi, dep habarlaıdy QazAqparat tilshisi.

«Túrikmenstannyń bastamasymen 2021 jyl Beıbitshilik jáne senim jyly dep jarııalanǵany belgili. Óıtkeni Túrikmenstannyń beıtaraptyǵy bitimgershilik, beıbit sıpatqa ıe. Biz búkil álemde beıbitshilikti nasıhattaımyz», - dedi Batyr Redjepov.

Sondaı-aq, elshi Qazaqstan men Túrikmenstan arasyndaǵy ekijaqty yntymaqtastyq qarym-qatynasqa toqtalyp ótti.

«Ortalyq Azııada tatý kórshilik pen dostyq ahýalyn qalyptastyrý – Túrkimenstannyń syrtqy saıasatynyń mańyzdy aspektisi. Qazaqstan Respýblıkasymen dostyq pen baýyrlastyqtyń myzǵymas baılanysyna, qos eldiń ortaq kópǵasyrlyq rýhanı jáne mádenı qarym-qatynasy negiz bola alady. Qazirgi tańda saıası-ekonomıkalyq jáne senimdi seriktestik negizinde qurylǵan Túrikmen-Qazaqstan dıalogy jańa serpin men mazmunǵa ıe. Bizdiń memlekettiń ózara yntymaqtastyǵy jeke múddeni kózdemeıdi. Túrikmenstan men Qazaqstan Eýrazııa keńistiginde ıgilikti maqsattardy júzege asyrýda ekijaqty kúsh-jiger men ınfraqurylymdy biriktirip, nátıjesinde aýqymdy jobalar iske asyp jatyr», - deıdi ol.

Dıplomattyń aıtýynsha, eki el arasyndaǵy beıbit qarym-qatynastyń negizin QR Tuńǵysh Prezıdenti-Elbasy Nursultan Nazarbaev, QR Prezıdenti Qasym-Jomart Toqaev jáne Túrikmenstan respýblıkasynyń Prezıdenti Gýrbangýly Berdimuhamedov qalyptastyrdy.

Aıta ketsek, búgin Nur-Sultan qalasynda Qazaqstan men Túrikmenstan arasyndaǵy dostyq qarym-qatynas taqyrybynda BAQ-qa arnalǵan baspasóz máslıhaty ótti.