Túrikmenstanda turatyn myńǵa jýyq qazaq «qandas» mártebesin alýǵa ótinim bergen

ASTANA. QazAqparat – Túrikmenstanda turatyn myńǵa jýyq etnıkalyq qazaq «qandas» mártebesin alýǵa ótinim bergen. Bul týraly «Otandastar qory» KeAQ prezıdenti Abzal Saparbekuly aıtyp berdi, dep habarlaıdy QazAqparat tilshisi.

«Ózderińiz bilesizder, soltústik óńirge qazaqtardy kóshirý máselesi boıynsha «Otandastar qory» jáne Syrtqy ister mınıstrligi qazir «bir tereze» qaǵıdatymen jumys isteıdi. Osy rette Túrikmenstannan kóshetin qazaqtarǵa baılanysty birqatar jumys atqarylyp jatyr. Munda birqatar túıtkildi másele bar, onyń ishinde Túrikmenstannan kóshetin qandastarymyzdy soltústik oblystarǵa turaqtandyrý máselesi. Kópshiligi Batys Qazaqstan aýmaǵynda qalǵysy keledi, soltúskke kóshkisi kelmeıdi. Mundaǵy negizgi mindet jergilikti atqarýshy organdardyń úlesinde. Eńbek mınıstrligi, Іshki ister mınıstrligi olardy qujattandyrý máselesimen aınalysatyn bolsa, olarǵa naqty materıaldyq kómek, jumyspen, baspanamen qamtý – jergilikti atqarýshy organdardyń quzyretine jatady», - dedi Abzal Saparbekuly «Otandastar qorynda» tilshilerge bergen suhbatynda.

Qor basshysynyń aıtýynsha, qazirgi ýaqytta Túrikmenstandaǵy myńǵa jýyq qazaq «qandas» mártebesin alýǵa ótinim bergen.

«Búgingi tańda «qandas» mártebesin shetelde júrip te alýǵa bolady. Osy Túrikmenstannan basqa, Mońǵolııadan 185 otbasyn kóshirý josparlanyp otyr. Jyl basynan beri ol jaqtan 15 otbasy kóship keldi. Olardyń da basym kópshiligin soltústik óńirlerge qonystandyrý josparlanyp otyr», - dedi Abzal Saparbekuly.

Buǵan deıin spıker Eýropada, AQSh, Reseı, Qytaıda qazaqtardyń quryltaıy ótetinin aıtqan edi.