Túrikmenstanda taǵy eki teńiz sýyn tuşylandyratyn zaýyt salynady

ASTANA.QazAqparat - Balqan ýálaıatynda (oblys) eki teńiz sýyn tuşylandyratyn zaýyt salý josparlanyp otyr, dep habarlaıdy TDH agenttigi.

Qýaty táýligine 50 myń tekshe metr taza sý óndirýge jetetin zaýyttyń biri Ekerem atyraby (aýdan) Esengýly  aýylynda salynbaqshy. Táýligine 5 myń tekshe metr taza sý óndiretin ekinshi zaýyt Hazar qalasynda salynady dep josparlanyp otyr.

Túrikmenstannyń Aýyl jáne sý sharýashylyǵy mınıstrligi bul nysandardyń jobasy jáne qurylysy boıynsha halyqaralyq tender jarııalady. Tender boıynsha ótinishter qabyldaý 14 shildege deıin jalǵasady.

Búgingi tańda Túrikmenstannyń teńiz jaǵalaýynda sýdy tuşylandyratyn birneshe zaýyt jumys isteıdi.Olardyń biri Kııanly atyrabyndaǵy Túrikmenbasy aýylyndaǵy qýattylyǵy táýligine 50 myń tekshe metr sý óndiretin stansasy jáne Avaz kýrortyndaǵy qýattylyǵy táýligine 35 myń tekshe metr tuşy sý shyǵaratyn qondyrǵy.