Túrikmenstanda prezıdent saılaýynyń ótetin kúni belgilendi
ASTANA. 8 tamyz. QazAqparat - Túrikmenstanda prezıdent saılaýy 2012 jyly 12 aqpanda ótedi. Bul jóninde túrikmenstandyq telearna habarlady, dep jazady Toptj.com.
Saılaýdyń ótetin ýaqytyn Túrikmenstan Májilisi (parlament) belgiledi. Buǵan deıin prezıdent saılaýy 2007 jyly 11 aqpanda ótkeni esimizde. Ol kún ómir boıyna prezıdent bolǵan Saparmurat Nııazovtyń qazasynan keıin (2006 jyl, jeltoqsan) belgilengen bolatyn. Sol kezde saılaýda respýblıka turǵyndarynyń 89,23 % paıyz daýsyn jınaǵan qazirgi prezıdent Qurbanquly Berdymuhamedov jeńiske jetti.
Shilde aıynda buryn elden qýdalanǵan jergilikti oppozıtsııa kóshbasshylary Qudaıberdi Orazov pen Nurmuhammed Hanamov Túrikmenstanǵa oralyp, prezıdent saılaýyna qatysatyndyǵy jóninde málimdedi. Buǵan deıin Qurbanquly Berdymuhamedov oppozıtsııa ókilderine saılaýǵa qatysý úshin teń múmkindikter men jaǵdaı jasaıtyndyǵyn málimdegen bolatyn.
