Túrikmenstanda Qazaqstan saýda úıi ashylady

ASTANA. QazAqparat - Ashhabadta ótken saýda-ekonomıkalyq mıssııa barysynda Qazaqstannyń Syrtqy saıası palatasy men Ónerkásip ıeleri jáne kásipkerler odaǵy arasynda Túrikmenstanda Qazaqstannyń saýda úıin ashý týraly kelisim jasaldy, dep habarlaıdy QazAqparat tilshisi. 

«Sondaı-aq, taraptar eki eldiń kásipkerleri úshin kirý vızasyn rásimdeýge ózara járdemdesýge kelisti», - dep málim etti QR Syrtqy saýda palatasynan.

Qazaqstandyq kompanııalar Túrikmenstan naryǵyna ónimderin ótkizýge kópten beri qyzyǵýshylyq tanytyp keledi. Atalmysh saýda-ekonomıkalyq mıssııa bul eldegi Qazaqstan elshiliginiń kómegimen ótti. Oǵan mashına jasaý, qurylys, farmatsevtıka jáne tamaq ónerkásibi salalaryndaǵy 16 kompanııa qatysty. Olardyń qatarynda «IT&M», «Qazfosfat», «QazAzot», «Kentaý transformator zaýyty», «Rahat», «Tıkkýrıla», «Qazaqstan Ǵarysh Sapary», «Azııa avto», «Baıan Sulý», «Port Quryk» jáne t.b. bar.

Elder arasynda týyndaıtyn negizgi problemalardyń qataryna túrikmenstandyq áriptester  qazaqstandyq kásipkerlerge tólem jasaý kezinde qıyndyqtarǵa dýshar bolyp jatatynyn jatqyzýǵa bolady. Bul manatty erkin aıyrbastaý múmkindiginiń bolmaýymen baılanysty. Sondyqtan birlesken jumystyń belsendiligin arttyryp, yntymaqtastyq ornatý maqsatynda «KazakhExport» AQ-nyń top-menedjrleri «Túrikmenstan» jáne «Halqbank» memlekettik bankteriniń ókilderimen, sondaı-aq «Ryzgal» kommertsııalyq bankimen kelissóz júrgizdi.

Saýda-ekonomıkalyq mıssııanyń nátıjeleri boıynsha, «Dolce» farmatsevtıkalyq kompanııasy yntymaqtastyq jónindegi eki memorandýmǵa qol qoıdy. Al «Beles-agro» JShS «Beles-Market» saýda belgisimen Túrikmenstaǵa bıylǵy jyly ár aı saıyn 3-4 myń tonna kóleminde un men ósimdik maıyn jetkizip turý týraly kelisimshartqa qol qoıdy.