Túrikmenstanda bir kúnde tórt birdeı mınıstr jumystan bosatyldy
ASTANA. QazAqparat - Túrikmenstan prezıdenti Gýrbangýly Berdimuxamedov tórt birdeı mınıstrdi qyzmetterinen bosatyp, ondaǵan sheneýnikke qatań sógis jarııalady. Mundaı sheshimdi Túrikmenstan basshysy on bir aıdyń qorytyndysy boıynsha ótken úkimet otyrysynda qabyldady, dep xabarlaıdy QazAqparat «Túrikmenstan búgin» aqparat agenttigine silteme jasap.
Atap aıtqanda, ózderine júktelgen mindetti durys oryndamaǵany úshin ónerkásip mınıstri Amanberdı Týılıev, eńbek jáne xalyqty áleýmettik qorǵaý mınıstri ári zeınetaqy qorynyń basshysy Seııtmammed Akmammedov, temirjol kóligi mınıstri Derıagýly Bıashımov, sondaı-aq aýyl men sý sharýashylyǵy mınıstri Nýrsaxed Sapardýrdyev laýazymdarynan bosatyldy. Úkimet otyrysy kezinde atalǵan vedomstvolarda qyzmet babyn asyra paıdalaný, para berý, jemqorlyq pen memleket qarjysyn jymqyrý áreketteriniń anyqtalǵany da jarııalandy.
Budan bólek, jumysta jiberilgen olqylyqtar úshin vıtse-premer Gochmyrat Myradov, energetıka mınıstri Charymyrat Pýrchekov, saýda jáne syrtqy baılanys mınıstri Dovraný Orazmyradov, munaı óńdeý zaýyttarynyń bas dırektory Dovletmyrat Bıashımov jáne taǵy basqa laýazymdy tulǵalar qatań sógis aldy. Sońǵy eskertý alǵandar da bar.
