Túrikmenstanda Arkadag atalatyn alǵashqy «aqyldy» qala ashyldy
AShHABAD. QazAqparat – Beısenbi kúni Túrikmenstanda el prezıdenti Serdar Berdymýhamedovtiń qatysýymen alǵashqy «aqyldy» qala Arkadag saltanatty jaǵdaıda ashyldy, dep habarlaıdy QazAqparat «Túrikmenstan búgin» basylymyna silteme jasap.
Ashhabadtan ońtústik-batysqa qaraı 30 shaqyrym qashyqtyqta ornalasqan jańa qalanyń qurylysy 2019 jyly bastalǵan bolatyn. Onyń negizin qalaý rásimine Halk Maslahatynyń (Parlamenttiń joǵary palatasy) tóraǵasy Gýrbangýly Berdymýhamedov qatysty.
Arkadag – eldegi alǵashqy «aqyldy» qala. Onda tek ekologııalyq taza kólikter (elektrobýstar men elektromobılder) qatynaıdy. Sondaı-aq qalada «aqyldy» turaqtar, kún batareıalary, jel generatorlary jáne taǵy basqasy ornatylǵan.
Aýmaǵy 1000 gektardy quraıtyn jańa shaharda 70 myńnan astam adam turady dep josparlanǵan.
Qurylystyń alǵashqy kezeńinde 336 zamanaýı ǵımarat boı kóterdi. Úılerdiń syrtyna jyl maýsymyna qaraı ishtegi temperatýrany rettep otyratyn jylý qaptamalary qoldanylǵan. Barlyǵy 258 turǵyn úı salyndy. Olardyń janynda mektepter, balabaqshalar, ózge de bilim mekemeleri men sport keshenderi ornalasqan.
Qazirgi ýaqytta 6 medıtsına mekemesi salyndy. Aldaǵy ýaqytta aýrýhanalardyń jelisi qurylatyn bolady, oǵan Ana men bala densaýlyǵyn qorǵaý ortalyǵy da enedi.
Sonymen qatar qalada 25 ákimshilik ǵımarat, 11 mádenı-saýyqtyrý ortalyǵy bar.
